Кызыл-Мажалыктан Айзана Сарыглар социал керээге үндезилээн күрүне деткимчезиниң ачызында күзели бүткен.
Эгелеп чоруур аныяк сайгарлыкчы гипстен суй белектер чагыдар черни ажытканын кожууннуң Чонну ажылга хаара тудар төп дыңнаткан.
Байырлыг ажыдыышкынга тус чер чагыргазының төлээлери болгаш аалчылар киришкен. Тус черниң аян-шинчизин көргүскен, 3D принтерге парлаан, суй белектер (Барыын-Хемчиктиң эрте-бурунгу тураскаалы «Кижи көжээ», тыва күрүнениң тургузукчузу «Ноян Буян Бадыргы»…) оларның кичээнгейин хаара туткан.
Айзана Сарыглар күрүне деткимчезиниң акша-хөреңгизи-биле бодунуң эскизтери-биле кандыг-даа хевирлерни кылыр 3D принтер дээш оон-даа өске дериг-херекселдерни садып алган. Ооң хууда ажыл-херээниң угланыышкыны – суй белектер, улусчу уран ус-тывыш кылыгларын бүдүрери болгаш садары.
Ус-шевер суй белектерниң эскизтерин чогаадып, чурагайлыг хевирге чедир кылып, гипске – бичии талисманнардан эгелээш, каасталга панноларынга чедир боттандырып турар. Ол бедик көдүрлүүшкүннүг ажыл-херээн ажыдып, келир үеже планнарын тургузуп эгелээн. Чоокку сорулгаларда – суй белектерниң янзызын көвүдедири.
Аныяк сайгарлыкчы төрээн чериниң тураскаалдыг чараш черлерин, культуразын көргүскен суй белектер кылырынче өскелерни сорук киирип, аныяктарга гипс-биле ажылдаар арга-мергежилин дамчыдары-биле өөредиглиг кичээлдерни эрттирерин планнап турар.