Сүт-Хөл кожууннуң Суг-Аксы сумузунда Александр Ондар аттыг культура одаанга Ада-чурт камгалакчызының хүнүнге база Шагаа байырлалынга тураскааткан барыын кожууннарның эң шыырак хоочун шыдыраачыларының аразынга шыдыраа маргылдаазы болуп эрткенин чагырга чери дыңнаткан.
Маргылдааны Сүт-Хөл кожууннуң чагырга даргазы Орлан Монгуш, Төлээлекчилер хуралының даргазы [id557644809|Андрей Хертек] база кожууннуң Хоочуннар чөвүлелиниң даргазы Виктор Сат ажыдып, шыдыраачыларга байырын чедиргеннер.
Спортчу хемчегге ниитизи-биле 20 шыдыраачы киришкен.
Изиг демиселдиң түңнелинде бирги черге Барыын-Хемчиктен Уран-оол Ооржак, ийиги черге ол-ла кожуундан Анатолий Хомушку, үшкү черге Чөөн-Хемчиктен Аян-оол Дулуш, дөрткү черге Сүт-Хөлден Александр Ооржак, бешки черге Кызыл-Тайга сумузундан Юрий Ондар төлептиг болганнар.
Эн улуг назыныг хоочун ойнакчылар – Кызыл-Тайгадан Карбы Ондарга, Барыын-Хемчиктен Ондар Чамыянга, Чөөн-Хемчиктен Куулар Дарый-оолга тускай шаңналдары тывыскан.
Угаан сайзырадыр оюннуң кол деткикчилери – кожууннуң Хоочуннар чөвүлели.
Хоочуннар өгбелеривистиң ынак оюну – шыдырааны малчыннар аразынга база доктаамал эрттирерин дугурушкан.
