Бөгүн «Тубтен Шедруб Линг» хүрээзинге башкылар ниитилелиниң республика чергелиг «Буддизм – амгы үениң школа болгаш немелде өөредилге системазында» деп шуулганның баштайгы хүнү болуп эрткен.
Шуулганга Санкт-Петербург, Москва хоорайдан башкылар, Тываның Камбы-Ламазы Лоден Шераб Хелиң болгаш өскелер-даа киришкен. Хүндүткелдиг Геше Джампа Тинлей Башкы шуулганның аалчызы болган. Башкы Тывага Россияның буддийжи университедин ажыттынарын каш чылдарның дургузунда күзеп келгенин дыңнаткан.
Октябрь 21-25 хүннеринде эртер өөредилге курстары башкыларның ажыл-чорудулгазынга чаа хевирлерни дилеп тывар арганы бээр.
Шуулганның эрттирикчизи, хүрээде уругларның буддийжи өөредилге төвүнүң өөредилге кезээниң эргелекчизи Айлана Балганның чугаалап турары-биле алырга, бо шуулган 2022 чылда Россияның Президентизи В.В. Путинниң даалгазы-биле тургустунган Буддизмниң өөредилгезинге болгаш шинчилелдеринге деткимче көргүзер фондузунуң деткимчези-биле эртип турар. Грантының түңү – 500 муң рубль.
– Беш хүн үргүлчүлээр шуулганга уругларны чаа педагогика технологиялары-биле өөредип турар башкылар Санкт-Петербургтан Маргарита Кожевникова биле Москвадан Ольга Ускова хемчегниң киржикчилеринге «Социал-сагыш-сеткил-этика өөредилгезинче киирилде» курузун эрттирип, арга-дуржулгазы-биле үлежир.
Мында ТР-ниң Өөредилге яамызының, ТывКУ-нуң удуртулгазындан аңгыда Кызыл хоорайның болгаш республиканың аңгы-аңгы кожууннарындан башкылар, социал педагогтар, психологтар чыглып келген.
Курстар эрткен соонда улаштыр кандыг базымнар кылыры билдинер. Бо дээрге киирилде өөредилге-дир. Кижизидилге системазынга буддизмниң үнелиг чүүлдерин ханызы-биле ажыглаарының аргаларын өөренип көөрү дараазында базым. Ону кандыг хевирге сайзырадырын өөредилге соонда түңнеп – школалар баазаларынга шенелде шөлчүгештер кылыр азы бот өөредилге-биле өөренириң дугайында чугааны кылыр бис – деп, Айлана Балган шуулганның сорулгаларын дыңнаткан.
Кызылда президентиниң кадет училищезиниң кижизидикчи башкызы Кежиктиг Куулар ук шуулган өзүп олурар ажы-төлдүң иштики сагыш-сеткилин шын орукче углап баштаарынга, мөзү-шынар кижизидилгезинге ужур-дузалыг болурун демдеглээн.