Шагааның Ак айынга тураскааткан «Өгбелерниң чечен-мергенинге өөрениили» деп школа назыны четпээн уруглар өөредир албан черлериниң кижизидикчи башкыларының республика чергелиг эртем-практиктиг конференциязының бир дугаар шөлчүгежинге тыва оюннар дамчыштыр уругларны өөредиринче угланган айтырыгларны чугаалашканын Национал школа хөгжүдер институт дыңнаткан. Ооң-биле чергелештир уруглар садтарынга төрээн (тыва) дыл башкылаашкынынга хамааржыр чидиг айтырыгларны сайгарган.
Бичии оолдарга эр кижиниң үш адаан-мөөрейлиг оюннары болур ча адары болгаш тыва хүрешти өөредириниң янзы-бүрү аргаларын илеткелчилер саналдаан.
Мугур-Аксының «Чечек» уруглар садының ыры-хөгжүм башкызы Эртине Хертектиң «Тыва улустуң «Ча адары» деп оюнунуң оол уругнуң кижизидилгезинге ужур-дузазы» деп илеткели дыңнакчыларның сонуургалын оттурган.
Эртине Одаг-оолович боду ук темага өөредилгениң чижек программазын уругларның хар-назынынга дүүштүр ажылдап кылып алган. Ону боттандырары-биле, оолдарның дурт-сынын барымдаалап, улуг эвес хемчээлдиг ча, согуннарны интернет-садыгдан чагыдып алгаш, кичээлдер үезинде ажыглап турар.
Башкының бо арга-дуржулгазынга даянып, шак-ла мындыг ажылды республиканың уруглар садтарынга нептередирин конференцияның киржикчилери шиитпир кылдыр хүлээп алганнар. Мындыг хевирлиг чыыштарның ачызында кижизидикчи башкыларның хей-аъды көдүрлүп, оларның чогаадыкчы езу-биле ажылдаар күзелин оттуруп турар деп түңнеп болур-дур.
