Бензин болгаш дизельдиг кывар-чаар чүүлге өртектерни бадырар дээш

Тывада бензин болгаш дизельдиг кывар-чаар чүүлге өртектерни бадырары-биле бензин кудар станцияларга субсидия бээриниң чурумун тодараткан.

Республика Чазааның чанында “Энергия камналгазы болгаш кедилиг хөгжүлде төвү” күрүнениң автономнуг албан чери таварыштыр бензин кудар станциялар ээлеринге автомобиль кывар-чаар чүүлүнүң өртээн бадырарынга Тываның бюджединден субсидияны шилчидип эгелээр. Тываның Баштыңы Владислав Ховалыг ооң дугайында доктаалга атты салган.

Август төнчүзүнде, сентябрь эгезинде, мөөңнеп садар рынокта кывар-чаар чүүлдүң өртээ хенертен өскенинден, регион бюджединден кывар-чаар чүүл өртээниң кезээн эгидер дугайында шиитпир хүлээп алдынганын сагындыраал.

Августуң 31-ден сентябрь 14-ке чедир Тывада литр солярканың өртээ 65,84 рубль турганындан 77,80 рубль, азы 12 рубльге аартаан. Ийи неделя бурунгаар АИ-95 бензинниң садар өртээ 61,31 рубль турган болза, бөгүн ол – литрде 65,60 рубль хире. Тываже киир сөөртүп турар кывар-чаар материалдар, барааннар, аъш-чемни өске регионнардан автотранспорт-биле дажыглап турары өртектерге салдарлыг.

Владислав Ховалыг регионалдыг бензин кудар станциялар ээлеринге республиканың чурттакчы чону эвээш өртек-биле кывар-чаар чүүлдү садып алыр кылдыр, ооң өртээнге немелде хуузунга компенсацияны алырынга чазактың төлээлеттинген оператору – “ЦЭР” КАА-биле дугуржулганы чарып алырын сүмелээн.

Оон аңгыда, тус черниң хандырыкчылары мөөң садыгжылардан моондак чокка садыгланырын хандырып, төнчү өртээн эвээжедиринге таарымчылыг логистика схемаларын тыварынга дузаны кадарын Тываның Баштыңы аазаан. Одалга болгаш энергетика яамызы ол дээш харыысалгалыг. Ол дээрге түр үениң хемчээ дээрзин Владислав Ховалыг айтып, октябрьда одаар чүүл рыногунда байдал турум апаар деп чугаалаан.

ТР-ниң Одалга болгаш энергетика яамызы Тываның Баштыңының даалгазы-биле, бо неделяда автомобиль кывар-чаар чүүлүн садарынга субсидия бээриниң чурумун ажылдап кылган.

Кывар-чаар материалдарының кол улуг шыгжамыры болур Кызыл хоорайдан 90 километр чедир ыракта бензин кудар станциялар ээлеринге литрде үш рубльге компенсацияны бээринге регион эрге-чагыргазы белен. А найысылалдан 90 километрден ыңай турар, бензин биле солярка садып турар бензин кудар станциялар ээлери литрде 5 рубль субсидияны алырын тодараткан.