Беш социал төлевилел Президентиниң грантылар фондузундан деткимчени алыр

Президентиниң грантылар фондузундан деткимче бээр конкурстар чылда ийи катап эрттип турар. Бо чылын ийи конкурсче кирген 52 чагыг аразындан Тывада коммерцияга хамаарышпас организацияларының беш төлевилели түңнелди эрткен. Фондудан оларны боттандырарынга үш сая хире рубльди аңгылаан. Июль 1-ден акшаландырып эгелээр.

Чурттуң Президентизиниң 2022 чылда грантыларынче конкурстуң бирги тиилекчилери бо чылдың январьда тодараттынган. Сергей Кириенконуң башкарганы Дүүштүрүлге комитединиң июнь 10-да эрткен хуралында, Хамааты ниитилел хөгжүлдезиниң талазы-биле фондунуң ийиги конкурузунуң түңнелдерин үндүрген.

Бо чылын 9,8 млрд рубльди Президентиниң грантылар фондузунуң шугуму-биле коммерцияга хамаарышпас чазактың эвес организацияларны деткииринче угландырган.

Тывадан коммерцияга хамаарышпас ийи организация бирги конкурстуң түңнели-биле грант деткимчезин алыр. Кызыл хоорайның хөй-ниити организациязы «Хатико» дириг амытаннар камгалаар ниитилел» база «Тыва Республиканың чурттакчы чонунга социал дуза көргүзер идепкейжи кижилер эвилели» регион хөй-ниити организациязының «60+ бистерге үе» төлевилели кирген.

Ийиги конкурстуң түңнелинде «Арага болгаш наркотиктерден хамаарылгалыг апарган кижилерни деткиир «Дамырак» төвү» автономнуг коммерцияга хамарышпас организацияның «Бодумче орук» төлевилели, аныяктар эгелээшкиннерин деткиир «Каптагай» деп аттыг Тываның регион хөй-ниити организациязының «Этнодой» пор кылыглар уран чүүлүнүң школа-студиязы» төлевилели база «АС-Профи» немелде өөредилге хуу албан чериниң «Келир үениң авазының хүн демдеглели» деп төлевилели шилилдени эрткен.

Президентиниң грантылар фондузунуң дараазынче конкурузунче чагыгларны 2022 чылдың сентябрь 1-ден октябрь 17-ге чедир хүлээр.

#Тываныңчазаа #Президентиниңгрантыларфондузу #Социалтөлевилелдер #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews5