Бөгүн Тываның хамааты байдалдың актылар бижидилгезиниң Кызылда эргелелинге Василий Федорович Васильев биле Аргина Дмитриевна Паланың «изумруд кудазын» херечилеп бадыткаан байырлыг хемчег болуп эрткен. Олар өг-бүле тудуп, кады эгин кожа чурттанындан бээр 55 чыл четкен.
Хүндүткелдиг өгбелер алдын билзектер-биле солушкан соонда, ТР-ниң Юстиция, Күш-ажыл болгаш социал политика яамыларның, Кызылдың Төлээлекчилер хуралының, Ниити-российжи улусчу фронтунуң Тывада салбырының, Онкология диспансериниң төлээлери, хөй-ниити ажылдакчызы Айлана Ховалыг, чоок кижилери оларга байыр чедирип, боодал чечектерни болгаш суй белектерни сөңнээн.
Аалчылар хоочуннарны аныяк-өскенге үлегер-чижек болуп чоруурун онзалап демдеглээн. Олар аас-кежиктиг болгаш быжыг өг-бүле бот-боттарынга хүндүткелден, сагыш човаашкындан, деткимчеден, бүзүрелден хевирлеттинер дээрзин демдеглээн. «Бот-боттарыңарны кажанда-даа хомудатпаңар. Амыдыралчы айтырыгларны кады шиитпирлеп, эп-найыралдыг болуңар» –деп, өгнүң херээжен ээзи аныяк өг-бүлелерге чагыын берген.
Василий Васильев 1967 чылда Тываже Тамбов областан келген. Ол аэропортка 30 ажыг чыл авиатехниктеп ажылдаан. Хоочун огород ажылынга ынак. Аргина Паланы Тывада танывас улус ховар. Ол Россия Федерациязының кадык камгалалының тергиини, Тываның улустуң эмчизи болгаш кадык камгалалының алдарлыг ажылдакчызы, онкология албанының хоочуну, хөй-ниити ажылдакчызы.
Чуруктарны Ада Тюлюш тырттырган
