Бии-Хем кожууннуң Аржаан сумузунуң хүндүлүг чурттакчылары Владимир биле Юлия Сундуйлар өг-бүле тудуп, кады чурттаанындан бээр 58 чыл четкен.
«Ногаан кудазын» демдеглеп турар хүндүлүг дыштанылгада хоочуннар бир оол, дөрт кыстың ажыл - ишчи, үлегерлиг ада-иези.
Владимир Михайлович Тандының Бай-Хаак чурттуг. Ол 1946 чылда Малиновка арбанынче көжүп келген. Аржаан сумузунга 1962 чылда "Өөк" совхозунга инек кадарып, малчыннап турган. 1964 чылда Юлия Григорьевна-биле өг-бүле тутканнар. Өгнүң кыс ээзи бызаа азырап, саанчылап турган. Ийелээн күш-ажылдың хоочуннары. Амгы үеде олар хууда малын азырап чоруур.
Владимир Михайлович октябрь айда 80 харлаар. Хоочуннуң назы-хары чеже-даа улгаткан болза, ол аъдын тергелеп алгаш, боду ыяштап алыр.