Бичии хуурак Тензин Сат лама болур күзелдиг

Эрткен чылын, бир чыл бурунгаар, Тубтен Шедруб Линг хүрээзинде чаштарга сарыг шажын өөредилгезиниң төвү ажыттынган. Ону Тываның Чазааның болгаш Күжүгет Шойгу аттыг культура фондузунуң деткимчези-биле тургускан.

Тываның аңгы-аңгы булуңнарындан бичии хуурактар ында төвүт дыл болгаш сарыг шажынның кол-кол үндезин өөредиглерин шиңгээдир дээш, чедип келгенин республиканың немелде өөредилге сайзырадыр төвү дыңнаткан.

Бичии хуурактарның бирээзи - Тензин Сат. Ол Кызыл хоорайның 5 дугаар гимназиязында өөренип турар. Тубтен Шедруб Линг хүрээде хуурак кылдыр база өөренип турар. Хүрээде өөренип нбээр март айда ийи чыл болур.

Бо үеге чедир алфавитти, ажык үннерни, немелде үннерни өөренип алган, төвүт дыл кырында бижээн сөзүглелдерни номчуптар апарган. Хүрээде кичээлдер суббота санында болур.

«Кичээл бүрүзүн видеода бижиттирип ап тур бис, оон бажыңга баргаш, катаптаарынга белен болур. Чогум берге эвес, чүге дизе мен дөрт харлыымда-ла хуурак кылдыр өөренир күзелим бар. Ачам Тываның Камбы-Ламазы Джамбел Лодойнуң (Апыш-оол Саттың) соон истеп, сарыг шажынны шилип алган мен. Ынчангаш буддизмге хамаарышкан өөредилге меңээ билдингир, ону чииги-биле сагыш-сеткилимден хүлээп ап турар мен. Хүрээге өөренири дыка солун, күзелдиим-биле кичээлдерже барып тур мен. Чаңгыс-даа кичээл үспедим. Хүрээ тургустунган соонда, чыгган бирги бөлүкте өөренип кирген болгаш, бирги хуурактарның санында кирген мен» – деп, Тезин чугаалаан.

Бичии хуурак школа болгаш хүрээден аңгыда, Кызылдың немелде өөредилге төвүнде англи дыл бөлгүмүнче барып турар. Оон ыңай «Гроссмейстер» клубтуң шыдыраачыларның бирээзи. Беш харлыындан эгелээш, «Олимп» спорт клувунда «Кога» дзюдо клувунда белеткенип турар.

«Черле хуурак болур күзелдиг турдум, ол ам-даа өскерилбээн. Ол хевээр сарыг шажынның өөредилгелерин шиңгээдип, лама болур сорулгам бар. Ону хөй чылдар ишти өөренгеш чедип алыр деп билир мен. Кезээде ачам ышкаш болурун күзээр мен» – деп, бичии хуурак демдеглээн.