Бии-Хем кожуунда хаван фермазын тудуп турар

2025-2030 чылдарда Тыва Республиканың социал-экономиктиг хөгжүлдениң амы-хууда программазы езугаар «Восток Агро» кызыгаарлаан харыысалгалыг ниитилелдиң бүдүрүлгези долу күчүзү-биле ажылдаар хаван фермазын тудар инвестиция төлевилелин боттандырып турар. ТР-ниң Хөгжүлде фондузунуң тускай мергежилдиглери объектини хынап, төлевилелди хыналдада алган.

Төлевилел 2024 чылдан ажылдап эгелээн. «Восток Агро» кызыгаарлаан харыысалгалыг ниитилелдиң бүдүрүлге ажыл-чорудулгазының шупту чадаларын, ооң иштинде тарылга ажылдарын болгаш мал чеминиң белеткелин, ол ышкаш хаваннар ажаап өстүрерин чорудуп турар. Бо ажылдың сөөлгү чадазы – эът болгаш эъттен белеткээн чаагай продукциязын садып-сайгарылгаже киирген. Ажыл-агый артынчы чок ажылдаар болгаш чиг этти долузу-биле болбаазырадыр арганы ажыглап турар.

Амгы үеде ферма 500 хаванныг, ооң баш санын 1000 чедирер планныг. Хаваннары эъткир болгаш чаглыг уксаалыг — ландрас биле тетрен. Чем кылдыр колдуунда бодунуң бүдүрген арыг чемнерин ажыглап турар.

Бүдүрүлге бодунуң продукциязын бүдүрүп турар. Чижээ, ооң хаван, инек, аът эъдинден какпактаан эъди тускай сертификаттыг, 2025 чылда Россияда эң эки 100 продукцияның санынче кирген.
Төлевилелде көрдүнгени езугаар бүдүрүлге 15 ажылчын олут тургускан.

Ажыл-агый Туранда «Эът садыы» деп тускай садыын ажыдып, продукциязын таарымчалыг өртекке садып турар. Немелде бүдүрүлге шугумнарын оон-даа калбартып, манчы кылырын планнаан.

Социал-экономиктиг хөгжүлдениң амы-хууда программадан 107,203 сая рубль субсидияны ап, көдээ ажыл-агый бүдүрүлгезин калбарткан. Ол күрүне деткимчези-биле хаван фермазын улгаттырып, аңгы азырал, дезинфекция кылыр, мал согар чер тудуунче ажыглаар планныг.

«Восток Агро» кызыгаарлаан харыысалгалыг ниитилелдиң бүдүрүлгези объектини бо чылдың октябрь эгезинде ажыглалче киирер чөпшээрелди алырын планнаан, ооң соонда долу күчүзү-биле ажылдап эгелээр.