Бии-Хем кожууннуң эң дээре хол бөмбүкчүлери – Аржаанда

Бии-Хем кожууннуң төвү Туран хоорайга «Мээң төрээн суурум – Аржаан» деп кожуун чергелиг шилиндек херээжен командалар аразынга хол бөмбүүнүң маргылдаазы болуп эрткен.

Маргылдаага тос команданың 72 спортчузу киришкен. Хол бөмбүкчүлери аныяк-өскенге, аарыкчыларга чараш оюнун көргүскен. Аржаан сумузунуң командазы бирги черге төлептиг болган. Ийиги черни Туранның, үшкү черни Найыралдың командалары тус-тузунда чаалап алганнар.

“Эң дээре камгалакчы” – Айдың Соскал, "Эң дээре дамчыдар ойнакчы» –Олча Кара-Сал, "Эң дээре халдакчы" – Чодураа Серен, "Арга-дуржулгалыг, чараш оюннуг" – хоочун ойнакчы Хаяна Тогус. Оларга тускай белектерни тывыскан. Бии-Хем кожууннун шыырак дээн универсал спортчуларының бирээзи – Алина Кужугет. Солун техниктиг оюну бараалгаткаш, тускай шаңналга Мергена Сотпа төлептиг болган.

Бии-Хем кожууннуң херээжен командалар аразынга «Мээң төрээн суурум – Аржаан» деп маргылдааны бедик деңнелге эрттирген. Аржаан сумузунуң хол бөмбүкчүлеринге, деткикчилерге чагырга черининиң удуртулгазы четтиргенин илереткен.

Тиилекчи командаларга акша шаңналдарын болгаш тускай белектерни тывыскан.

Дараазында август айда эртер маргылдааны Хадын сумузунуң төлээлери хүлээнип алганнар.