Бии-Хемде Аныяктар чөвүлели ажылын эгелээн

Бии-Хем кожуун даргазының хүлээлгезин күүседип турар Роман Васильевтиң эгелээшкини-биле кожууннуң Аныяктар чөвүлелиниң бирги организастыг хуралы болуп эрткен.

Бии-Хем кожууннуң чагырга даргазының социал политика талазы-биле оралакчызы Орлан Байкара, Туран хоорай чагыргазының даргазының социал политика талазы-биле оралакчызы Елена Намчилова, кожуун чагыргазының чанында Хөй-ниити чөвүлелиниң даргазы Александр Сат дээш, кожуун чагыргазының төлээлери аңаа киришкен.

Аныяктарның күчү-шыдалын боттандырарының шөлү кылдыр Аныяктар чөвүлелин тургузарының чугулазын ужуражылганың киржикчилери демдеглээннер. Чөвүлел профессионал өзүлдени бедидеринге чаа билиглерни болгаш арга-дуржулгаларны шиңгээдир, ол ышкаш аныяктар политиказын боттандырарынга чагырга чери-биле биле аныяктарның аразында удур-дедир кады ажылдаарының дээштиг шөлү болур.

Кожууннуң сумуларын төлээлээн он идепкейлиг аныяктар чөвүлелче кирген. Ооң даргазынга амгы үеде Бии-Хемниң аныяктар төвүнүң удуртукчузу Аясмаа Лакпар соңгуткан.

ТР-ниң Аныяктар херээниң талазы-биле яамызының медээзи-биле алырга, Тывада Каа-Хем, Бии-Хем, Таңды, Чаа-Хөл база Тес-Хем кожууннарда база Ак-Довурак хоорайда Аныяктар чөвүлелдери ажылдап турар.