Тарлаг сумузунче кирер орук чоогунда чаа туттунган субурганны байырлыг байдалга ажытканын чагырга чери дыңнаткан.
“Цеченлинг” хүрээзинден Чамбал башкы чыылган чонга субурганның ужур-дузазының дугайында тайылбырны кылып, мөргүл номчаан.
Бии-Хемниң чагырга даргазының хүлээлгезин күүседип турар Алдай-Мерген Ховалыгның дыңнатканы-биле алырга, кожууннуң девискээринде бо чедиги субурган болуп турар. Ол Тывада чылдың кол болуушкуннарының бирээзи – делегей чергелиг IV сарыг шажын шуулганы болур чылда ыдыктыг субурганны тудуп, ажытканын онзалап демдеглээн.
Субурганны тарлагжыларның болгаш кожууннуң чүдүкчү чонунунуң деткимчези туттунган. Оларның хөй кезии Тарлаг суму чагыргазының Өөрүп четтириишкин бижиктери-биле демдеглеттинген.
Байырлыг хемчег чалыы мөгелер аразынга хүреш маргылдаазы-биле доозулган.
Тарлагда субурган – шажын-чүдүлгениң демдээ болгаш сагыш-сеткил күжүнүң чери апаар.