Бии-Хемниң эң шалыпкын даараныкчызы – Оюмаа Донгак

Туранның культура бажыңынга «Эва» дизайн-студиязының удуртукчузу, социал сайгарлыкчы, немелде өөредилге төвүнүң башкызы Эвелина Байсклан тыва тон даараарынга мастер-классты эрттирген.

Ийи хүн үргүлчүлээр марафонга «узун шөлээде» аваларга, тускай шериг операциязында киржип турар дайынчыларның өг-бүлелериниң кыс ээлеринге, дааранып өөренип алыр күзелдиг херээжен чон боттарынга, ажы-төлүнге тыва тонну быжып, даарап өөренген. Ниитизи-биле аңгы-аңгы назы-харлыг 28 херээжен даараныкчы киришкен.

Кымны-даа мурнай тоннарны даарап доозупканнарны шаңнап-мактаан. Бирги черге Аржаан сумузундан дөрт ажы-төлдүг үлегерлиг ава Оюмаа Донгак төлептиг болган. Ол сумунуң көдээ культура бажыңының удуртукчузу.

Ийиги черни Туран хоорайның төлээзи Айлаңмаа Ооржак, үшкү черни Хадың сумузундан Надежда Даржаа ээлээн.

ТР-ниң Дээди Хуралының өөредилге, культура, спорт болгаш аныяктар талазы-биле ажылдаар комитеттиң даргазы Аяна Монгуш тон даараар марафоннуң киржикчилерге байыр чедирбишаан, бодунуң өмүнээзинден суй-белектерни тиилекчилерге тывыскан.

«Алдын холдуг» ус-шеверлерниң башкызы, «Эва» дизайн-студиязының удуртукчузу, дааранып өөренип алыр күзелдиглер-биле арга-дуржулгажын үлежип, дамчыдып чоруур буянныг ава Эвелина Байскланга бии-хемчилер моон-даа соңгаар чогаадыкчы чедиишкиннерни күзээн.

Тыва тон даарап өөренип алыр күзелдиг херээжен чон баш бурунгаар торгу, хорагай, тоннуң иштии тодарын, национал өөктерни садып алгаш Шагаа байырлалының бүдүүзүнде боттарыңарга болгаш өг-бүлезиниң кежигүннеринге тыва тонну даарап алганнар.

Тускай шаңналдарга төлептиг болган шеверлерни кожууннуң чагырга чери, хууда сайгарлыкчы Саида Салчак, кожууннуң чагырга даргазының экономика талазы-биле оралакчызы Аяна Дендип олар деткип, өртектиг белектерни тывыскан.

Ук марафонну социал сайгарлыкчы ТР-ниң Дээди Хуралы, «Россияның авалары» бүгү-российжи хөй-ниити шимчээшкининиң регионалдыг салбыры, «Россияның чөленгиижи» хөй-ниити организацияның регионалдыг салбыры-биле кады организастап эрттирип турар.