Бир улуг кокайны аглааны дээш төлевирниң хемчээли – 8000 рубль

Азыг диштиг араатаннарның халдаашкынындан Тываның малчыннары когарап, чылда-ла муң-муң баш мал-маганны ышкынып турар.

ТР-ниң Дириг амытаннар объектилерин камгалаар күрүне комитединиң удуртукчузу Артыш Салчактың дыңнатканы-биле алырга, республикада 129 бөрүлер аглаар бригада ажылдап турар.

Аңчыларга бир кокай дээш республика бюджединден шаңналды: эр-кызы хамаанчокка бир улуг бөрү дээш сес муң рубль, алды ай чедир бөрзек дээш ийи муң рубльди төлээрин сагындыраал.

Чамдык кожуун чагырга черлери үре-түңнелдиг бөрү аглакчыларынга боттары шаңналды тургускан. Чижээ, Тере-Хөл биле Тожу кожууннар алды муң рубльди немей төлээри көрдүнген. Чамдык кожууннар бир кокай бажынга шаңнал кылдыр одаар чүүлдү азы хойну берип турар.

Аңчылар аткан бир бөрү бажынга шаңналдан аңгыда, ооң кежин саткаш база акшазын алырлар. ТР-ниң дириг амытаннарны камгалаар күрүне комитединге бүрүткеткен соонда, аңчыга ооң кежин эгидип бээр. Аңныыр хайгаарал күрүне комитединиң үнези-биле алырга, эки эттээн кеш аңчыга 30 муң рубль чедир акшаны эккеп болур.