Бо чоокку үеде сезоннуг грипптиң көдүрлүүшкүнү эгелээр

Росхереглелхайгааралдың Тыва Республикада эргелелиниң специалистери бөгүнде Тывада эпидемиологтуг байдал чогумчалыг дээрзин демдеглээн. Коронавирус халдывырындан аараан чоруктарның саны баткан.

Эрткен неделяда хамчыктыг халдавырдан аараан 4 кижи илереттинген, ооң мурнунда неделядан 60 хуу эвээш. Амгы үеже эмчилерниң хайгааралында ковид-19-туг 10 аарыг кижи бар. Оларның бирээзи берге, алдызы ортумак байдалдыг деп, кадык камгалал сайыды Анатолий Югай дыңнаткан.

ОРВИ-ден аараан кижилерниң саны эрткен неделяга деңнээрге 17,8 хуу көвүдээн, ындыг болзажок эпидхемчээлге амдыызында четпес.
Росхереглелхайгааралы амгы үеде байдалды өөренип көргеш, эмнелге, социал болгаш өөредилге албан черлеринге хууда камгалал чүүлдерин албан кедер дээн негелдениң орнунга, камгалал масканы кедип болурун сүмелээн деп республика баштыңының чарлыынче өскертилгени киирерин саналдаан.

Эпидемиологтар бо чоокку үеде сезоннуг грипптиң көдүрлүүшкүнү эгелээрин, а 2023 чылдың эгезинде коронавирус халдавырының ээлчеглиг чалгыын чурттуң девискээринге манап турарын дыңнадып, республиканың эмнелге албан черлери белен болурун, Чазак регионда амгы эпидемиологтуг байдалды дарый хайгаараарын, а Росхереглелхайгааралының республикада эргелелиниң удуртукчузу Людмила Салчак неделя санында Тываның Баштыңынга байдалды илеткээрин чугаалашкан.

Даанган девискээринде чурттакчы чонга гриппке болгаш ковид-19-ка удур катап тарылга кайы хире чоруп турарын кожуун чагырга даргалары боттарының хайгааралынга алыр.

Людмила Салчактың дыңнатканы-биле алырга, республиканың чурттакчы чонунуң 43 хуузу, азы планның 72 хуузу гриппке удур тарыткан. Эмчилер сезоннуг эпидкөдүрлүүшкүн мурнунда чоннуң 60-дан эвээш хуузун тарыыр ужурлуг, ылаңгыя онза бөлүкте хамааржыр хамаатыларже кичээнгейни углаар.

Улуг-Хем, Барыын-Хемчик база Тес-Хем кожууннарда, Кызылдың чамдык эмнелге албан черлеринде халдавырлыг аарыгларга удур тарылганың темпизи кошкак. Бай-Тайга, Улуг-Хем база Кызыл кожууннарда бичии уругларны хаара тудуп турары оожум.

Байдал ажырбас-даа болза, профилактиктиг хемчеглерниң шуптузун сагыырын Росхереглелхайгаарал сүмелээн. Эртенги шактарда организацияларже киирерде хынап, аарыг уруглар болгаш ажылдакчыларны аңгылап, өрээлдерни доктаамал аштап-чүлгүүрүн сүмелээн.