Бо чылын 1200 тонна далганы дээрбедеп бүдүрер

Республиканың ийи тараачын арат ажыл-агыйының баштыңнары Михаил Санников биле Аяс Бавуу – Тываның 2020-2024 чылдарда социал-экономиктиг хөгжүлдезининиң амы-хууда программазының күүселдези езугаар инвестиция төлевилелдериниң шилилде мөөрейниң түңнелдери-биле далган дээрбедээр бүдүрүлгелерни ажыдар инвесторлар болганын ТР-ниң Экономиктиг хөгжүлде болгаш үлетпүр яамызы дыңнаткан.

Тараачын арат ажыл-агыйлар Таңды болгаш Чаа-Хөл кожуунда тарааны дээрбедеп, далганны болгаш ооң артынчызындан мал чемин бүдүрүп турар. Дээрбе чанынга тараа культураларын шыгжаар шаңнарны база туткан. Ында тус черниң чурттакчылары ажылдап турар.

Бо чылын ук бүдүрүлгелер 1200 тонна далганы дээрбедээр. Ук көргүзүглерни чедип алыр дээш инвесторлар 1530 тонна тараа культураларын тарып алганнар. Баштайгы бүдүрген 15 тонна далганны Кызылдың хлеб заводунче чогумчалыг (рынок өртээнден ийи катап чиик) өртекке дужааган.

Тараачын арат ажыл-агыйлары республиканың аъш-чем талазы-биле айыыл чок чоруун хандырар талазы-биле үлүүн киириштирип турары ол.