Тывада өскүс уругларга чурттаар оран-сава программазынга 2025 чылда 130 өскүс уруг чурттаар чер-биле хандырарынга федералдыг бюджеттен база регионалдыг кады акшаландырыышкынындан субсидия көрдүнген.
2025 чылда 133 хамааты ол эргезин ажыглаан: оларның аразындан 75 кижи чурттаар оран-саваны алган, үш кижи хосталган чурталга черлери-биле хандыртынган, 55 кижи чурттаар оран-сава сертификаттарын алган.
Ооң-биле чергелештир ТР-ниң Тудуг яамызы күрүне программазы-биле 75 чуртталга объектизин республиканың күрүне өнчүзүнче дамчыткан. Бо өнчү-хөреңги өскүс болгаш ада-иезиниң хайгааралы чок арткан уругларга дамчыдар кылдыр көрдүнген, оларның аразында:
- Кызылда чаа «Взлетный» болгаш «Спутник» микрорайоннарда 21 объект.
- Кызыл хоорайда чуртталга бажыңнарының ийиги рыногунда 29 объект.
- Кызыл кожууннуң Сукпак суурда 24 объект.
- Сүт-Хөл кожууннуң Суг-Аксы суурда бир объект бар.
ТР-ниң Өөредилге яамызының дыңнадыы-биле алырга, өнчү кылдыр чурттаар оран-сава садып алырынга социал ачы-дузаның ийи хевири база бар:
- херечилел (төлевириниң түңү – 1,7 сая рубль);
- сертификат (төлевирниң түңүн индексастаар).
ТР-ниң Өөредилге яамызы херечилел төлевирин алырынче билдириишкиннерни чылдың-на январь 15-тен март 15-ке чедир хүлээп турар. 164 кижи регионалдыг төлевирниң дузазы-биле хууда бажыңының болгаш квартиразының ээлери болган.
Республиканың тускай чуртталга фондузундан чурттаар оран-сава алыр эргелиг өскүс уругларның бадылаан даңзызында чуртталга байдалын экижидеринге хереглелдиг азы чурттаар оран-савага хереглелдиг кылдыр учетта тургустунган болгаш, ол эргени ажыглаваан хамаатылар кирген дээрзин демдеглээри чугула.
Бир эвес чаагайжыткан чуртталга бажыңын алыр эргезин чидирип алган болза, ооң иштинде чуртталга бажыңын өнчүзүнче садып алырда ипотека керээзи езугаар хүлээлгезинде акшазын долузу-биле эгидип берген болза, даңзыдан үндүрүп болур.
Чурттаар оран-сава алган аас-кежиктиг кижилерниң бирээзи – тераевт эмчи, невролог, тускай шериг операциязының киржикчизи Херелмаа Борбак. Ол бо чылын чуртталга бажыңы алыр даңзыче кирген социал деткимчеге хереглелдиг, өскүс деп санаттынып турар чаңгыс херээжен кижи болган.
«Бо хүннү дыка үр манадым. Бо дээрге дыка улуг деткимче болгаш чаа амыдыралдың эгези-дир. Бодум бажыңымны садып алырынга дузалашкан, меңээ бүзүрээн кижи бүрүзүнге четтирдим. Чааскаан эвес силер дээрзин база силерниң ажылыңарны үнелеп турар деп билип алыры дыка онза-дыр» – деп, Херелмаа Борбак өөрүшкүзүн үлешкен.