Тываның Чазаа республиканың социал-экономиктиг хөгжүлдезининиң амы-хууда программазының төлевилелдерин боттандырарынче 2022 чылда хуу инвестицияның чартык хире миллиард рубльди хаара тударын планнаан.
Бюджеттерниң аңгы-аңгы деңнелдеринден субсидиялар-биле кады акша салыышкының ниити хемчээли 1,5 млрд рубль ажа бээр. ТР-ниң Экономиктиг хөгжүлде болгаш үлетпүр яамызы программаны боттандырарының планын чазакче киирген.
Бо чылын программада сүт-бараан фермаларын тудуп база эде чаартыры, чылда-ла 260 тонна бойдус байлаан болбаазырадыр комплексти дериири, чурттакчы чондан кат-чимис, мөөгү, тоорук хүлээп алыр пунктуларны тургузары кирген.
Ол ышкаш «Чедер» курорт-дыштанылга комплекизиниң тудуун уламчылаар. Объектилерни дужаарга-ла, ону ажыдарын планнаан. Комплекс бо чылын 70 кижини дыштаныр кылдыр хүлээп алыр.
«Тайга» даг хаагының комплекизин ажыдарынга белеткел ажылдары калбарган. Даг өрү көдүртүр дериг-херекселди саткан, трассаны аштааш, дескилээн, автомобильдер тургузар шөлдерни чаагайжыткан. Хаактаар, чуңгулаар дериг-херекселдер хөлезилээр пунктуну, чемненир черни ам тудар. Бо сезонда бирги ээлчегниң объектилери ажыттынар ужурлуг.
Чуртталга тудуунда улуг ажылдар манап турар. 2022 чылда комплекстиг чуртталга тудуунуң беш төлевилелиниң ажылдары эгелээр. Ында 126 квартиралыг бажыңнар, бирээзинде-ле 150 орун-олуттуг ийи медицина төптери, 12 уруглар садтары база школалар, үш спорт объектилери, ийи культура-хөглээшкинниг төптер кирген. Ажыглалче киирер чуртталга бажыңнарның ниити шөлү 576,18 муң дөрбелчин метр. Оон 24 муң кижи квартираларны алыр.
Программа төлевилелдерин боттандырып тура, 232 чаа ажылчын олутту тургузар. Республиканың чурттакчы чонунуң ортузунда чединмес чорукту 34,1 хуу турганындан, 2024 чылда 23,5 хуу чедир кызырары – программаның сорулгазы кылдыр көрүп турар.
