Бо чылын 259914 тонна сиген-ширбиилди белеткээр

Тывага 2022-2023 чылдың мал кыштаглаашкынын хүр эрттирер дизе, 303080 баш малга 259914 тонна сиген-ширбиилди белеткээр, эрткен чылга деңнээрге үш хуу хөй.

Республиканың шупту ажыл-агыйлары 165 муң гектар шөлден ортумаа-биле, бир гектардан 14 центнер сигенни кезип алыр бодалдыг. Ниити сиген шөлдериниң 54,8 муң гектары күрүне даңзызында кирип турар. Араттар ооң чартык кезиинден сиген-ширбиилди белеткээр. Оон аңгыда ниити 40,4 муң гектар шөлден 52 муң тонна сигенни кезерин планнаан.

Сүт-бараан фермаларынга база “Туран” сыын ажыл-агыйынга ниитизи-биле 255 883 тонна сигенни, 2031,0 тонна сенажты курлавырлаар. С.В. Оюннуң арат-тараачын ажыл-агыйы фермазынга 2000,0 тонна силосту белеткээри планнаттынган.

Дыка хөй кожууннарда кааңнаанындан, тараа кылдыр ажыглаар дээш тараан 20 муң гектар черде тараа культураларын ам мал чеминге ажыглаар. Ынчап кээрге сенаж белеткээриниң хемчээли 15 муң тоннага көвүдей бээр.

Бо чылын мал чеминиң белеткелинче 29 сая рубльди тускайлап, 465 тонна кывар-чаар материалдарны садарын яамы санап үндүрген. Ол акша-хөреңгини ажыл-агыйлар боттары тыварын ТР-ниң Көдээ ажыл-агый яамызы дыңнаткан.