Тываның Чазаа 2026 чылда «Көдээ девискээрлерниң комплекстиг хөгжүлдези» күрүне программазы-биле чурттаар байдалын экижидер дээш социал төлевирлер алыкчыларының ниити даңзызын тургускан. Көдээде чурттап, ол ышкаш агроүлетпүр комплекизинде болгаш социал адырда ажылдап чоруур өг-бүлелерни деткиири көрдүнген.
2026 чылда ук сорулгаже 11,7 сая рубль көрдүнген, ооң 11,5 сая ажыг рубль – федералдыг бюджеттен. Программа көдээ чурттакчыларга боттарының бажыңнарын тудуп, амыдырап-чурттаарынга таарымчалыг байдалдарны тургузарынга дузалаар.
«13 муниципалдыг райондан 14 өг-бүлениң хууда херектерин комиссияже көөр кылдыр киирген. Чамдык муниципалдыг тургузуглар программага киржир дугайында билдириишкиннерни доктааткан хуусаада киирбээн» – деп, ТР-ниң Экономиктиг хөгжүлде яамызы айыткан.
Агроүлетпүр комплекизиниң ажылдакчылары социал төлевирлерни мурнады алыр эргелиг болган: Алдай-Мерген Ондар – Сүт-Хөл кожуунда тараачын-арат ажыл-агыйының баштыңы; Алаш-оол Онмээжек – Бай-Тайга кожуунда тараачын-арат ажыл-агыйының баштыңы; Эккер-оол Ондар – Кызыл кожуунда «Сайыр» муниципалдыг унитарлыг бүдүрүлгениң малчыны.
Программаның арткан киржикчилери республикада социал ажылдакчылар болган. 2026 чылда ниитизи-биле алды өг-бүле социал төлевирлерни алыр, олар 360 дөрбелчин метр ниити шөлдүг чуртталга бажыңнарын тудуп, ажыглалче киирер ужурлуг.
Бир эвес немелде акша-хөреңги тыптып азы бюджетти камнап алыр болза, ам-даа сес билдириишкин киирикчизи деткимчени ап болур. Тус чер бот-башкарылга органнарынга даңзыга тургускан хүнүн барымдаалап, төлевирни бээриниң ээлчээ тодараттынар деп, яамы дыңнаткан.