Бо чылын Чадаанага «Тос кожуун төвү» төлевилелдиң боттандырылгазы эгелээр

Чөөн-Хемчик кожууннуң төвү Чадаана хоорайга «Тос кожуун төвү» төлевилелдиң боттандырылгазы бо чылын эгелээрин чагырга чериниң даргазы Алага Ондар дыңнаткан.

Президент Владимир Путинниң эгелээни «Чуртталга оран-савазы болгаш хоорай хүрээлели» национал төлевилел боттандырылгазы-биле республиканың шупту 19 муниципалдыг тургузугларынга 30 хөй-ниити девискээрин (чаа стадионнарны, сесерликтер, спорт шөлдерин болгаш өске-даа объектилерни) тудар.

Чадаана хоорайның «Тос кожуун төвү» төлевилели тиилекчилер санынче киргенин сагындыраал. Паркты «Чадаана» стадионунуң артынга кылыр. Уруглар ойнаар, чадаг-тергежилерге база скейт-бордистерге тускай шөлдерни, эрик кыдыынга дыштаныр черлерни чаагайжыдар. «Ча-согун», «Тыва акшалар» база «Тыва үжүктер» темалыг галереяны кылыр. Ол ышкаш кафе база сценалыг шөлчүгешти база тудар.

Тывага шилиттинген төлевилелдерни боттандырынга федералдыг бюджеттен 100 сая рубльди тускайлаан. Республикага ол программа ажылдап эгелээнден бээр 145 хөй-ниити шөлдери чаагайжыттынган.