Россияның камгалакчылар эвилелиниң Дээди чөвүлелиниң даргазы Алексей Дударев-биле Тываның Баштыңы Владислав Ховалыг ужуражып тура, бажыңнар өрттеринге база угарлыг газтан хоранналырынга удур профилактика ажылын чорударын чугаалашкан.
Республиканың эрге-чагыргазы чурттаар черлерни өртке удур системалар-биле дериир регионда ажылды ам-даа күштелдирер. Ышталы бергенин дыңнадыр база кургаг чүүл-биле өжүрүптер боттары ажылдаар модульдарны ажыглаарының аргазын чазакта өөренип көрүп турарын Владислав Ховалыг дыңнаткан.
Хөй ажы-төлдүг, эвээш орулгалыг өг-бүлелерге, шимчей албас болгаш чааскаан чурттап турар хамаатыларга, социал айыылдыг байдалда азы амыдыралдың берге байдалында таварышкан өг-бүлелерге, «Чаа сорук» база «Аныяк өг-бүлеге кыштаг» күрүне программаларының киржикчилери өг-бүлелерге өртке удур системаларны халас салыр. Бир эвес ыш тыптып бээр болза, дыңнадыкчылар ыыткыр медээни берип, удуп чыдар кижини безин оттуруптар.
2021 чылда программа боттанылгазындан ниитизи-биле 113 муң рубль түңүнге 326 автономнуг өрт медээчилерин эптеп салган. «Камгалалдың коңгазы – өрт үезинде бир дугаарында оттуп келир» ачы-дуза акциязының үезинде чыгдынган акша-хөреңгиге 280 медээчини саткан.
Күрүне политиказының күүселдезин хайгаараар Тываның Күш-ажыл болгаш социал политика яамызы тус чер бот-башкарылга органнары-биле кады деткимчениң ол хевиринге хереглелдиг өг-бүлелер даңзызын бирги ээлчегде тургускан.
2023 чылда 696 ындыг өг-бүлеге өрт медээчилерин салырынга республика бюджединге 300 хире муң рубльди аңгылаар. Чаңгыс чер-чурттугларның хөй кезииниң айыыл чок чоруун күштелдирип, ажылды дүргедедири-биле, ачы-дуза акциязын ам база уламчылаар. Өнчүнүң кандыг-даа хевириниң организациялары база сагыш човангыр хамаатылар акцияга киржип болур.
Бир эвес акша-копеек-биле шыдаптар хамаатылар бар болза, боттары квартираларынга өрт медээчизин албан салып алырын республиканың камгалал албаны сүмелээн.
Өрээлге ыш тыптып келгенин дораан эскерип каар медээчиниң өртээ 300-500 рубль болур. А угарлыг газты "чыттап" каар херекселдиң өртээ 2-3 муң рубль болур.
