Бо чылын чээрби тос километр автоорукту септээр

ТР-ниң Орук-транспорт комплекизиниң яамызының дыңнадып турары-биле алырга, бо чылын “Айыыл чок болгаш шынарлыг автомобиль оруктары” национал төлевилелдиң чорудуу-биле регионалдыг оруктуң дөрт участогун, Кызылдың чоогунда чурттакчылыг черлерниң үш оруун, ол ышкаш ийи кылымал дериг-херекселди чогуур норма-чижээнче киирер. Ниитизи-биле 29 километр орукту септээринге федералдыг бюджеттен 575 сая, регион бюджединден 461 сая рубльди угландырар.

Септеттинер оруктарның талазы-биле керээлерни чарган, хүлээникчи организацияларга «Восток», «Суугу», «Строй-экспресс» болгаш «ДСТ» кызыгаарлаан харыысалгалыг ниитилелдерни тодараткан. Септелге ажылдары апрель төнчүзүнде эгелээрин Орук-транспорт комплекизиниң яамызы медеглеп турар.

Шак ынчалдыр, Хандагайты – Мугур-Аксы автомобиль оруун ийи чара шаап турар Барлык хемни кежилдир көвүрүгге, Кызыл-Мажалык – Аяңгаты автооруунуң Улуг-Аяңгаты хемни кежилдир көвүрүг хевирлиг эртер черниң септелгезин чорудар.

Ол ышкаш Кызыл – Сарыг-Сеп болгаш Суг-Аксы – Алдан-Маадыр авто-оруктарынга септелгени кылыр, Кызыл – Эрзин – Моол-биле күрүне кы-зыгаары автооруктуң ийи участогун болур-чогуур шинчиже киирер.

Оон аңгыда, Кызылдың оруктарынга септелге ажылдары база планнаттынган. Чижээлээрге, Колхозная кудумчузунда орук участогун ийи дилиндек турганындан дөрт дилиндек кылдыр чаартыр, ооң шывыын эде чадар. Колхозная болгаш Каменистая кудумчуларында оруктарны үндезини-биле септеп-селиир.