Бо чылын Ленинка арбанынче болгаш Тоолайлыгже дүрген харылзаалыг интернетти киирер

Эрткен чылгы бүгү-российжи бадылаашкынның түңнелдери-биле «Чурагайлыг дең эвес чорукту чайладыры 2.0» федералдыг төлевилелди күүседип, Бии-Хем кожуунда Ленинка арбанынче болгаш Мөңгүн-Тайга кожуунда Тоолайлыг суурже соталыг харылзааны киирер.

Чурттуң Президентизи Владимир Путинниң эгелээни «Россия Федерациязында чурагайлыг экономика» национал төлевилел шугуму-биле төлевилелди боттандырар. Тывада 250-ден 500 кижи чурттакчылыг 13 суурже төлевилел күүселдези-биле оптиктиг харылзаа шугумун шөйген.
Харылзаа операторлары төлевилелди боттандырып, спутниктиг технологияларны оптиктиг удазын-биле солуп, амгы үениң дүрген дамчыыр харылзаа ачы-дузазын киирген.

Президентиниң эгелээшкининиң ачызында, бөгүнде Успенка, Терлиг-Хая, Шаңчы, Ак-Чыраа, Сизим, Чал-Кежиг база Тарлаг суурларның школалары дүрген дамчыыр интернетте коштунган.

Россияда чурагайның дең эвес чоруун чайладыр дээн төлевилелдиң ийиги чадазы 2021 чылда эгелээн. 100-тен 500 чурттакчылыг биче суурларже мобильдиг харылзааны киирген. Тываның Ырбан, Качык, Хүт, Тал база Ийме суурларда ол төлевилел-биле соталыг харылзааның баазалыг станцияларын тургускан.

Бо төлевилел 2030 чылга чедир уламчылаар. Россияның Чурагай яамызы харылзаа ачы-дузазы киирер биче суурлар дээш чаа бадылаашкынны массалыг информация чепсектеринге база Күрүне ачы-дузаларының порталынга бо чылдың бирги чартыында чарлаптарын Тываның Чурагайлыг хөгжүлде яамызы дыңнаткан.

Республиканың эрге-чагыргазы Россияның Чурагайлыг хөгжүлде яамызы-биле кады муңдан хөй чурттакчылыг ыраккы болгаш чедери берге суурларже оптиктиг удазын харылзаа шугумун киирер ажылды чорудуп турар. Ындыг суурларга Кунгуртуг, Кара-Хөл база Мөген-Бүрен хамааржыр.

Күүселдези нарын болгаш, 350 сая хире өртек үнелиг улуг төлевилелдиң боттандырылгазы бо чылын эгелээрин Тываның Баштыңы Владислав Ховалыг дыңнаткан турган. Ол ажылдарны ийи чыл дургузунда кылыры планнаттынган.