Өөредилгениң школа системазын эде чаартыр федералдыг программа шугуму-биле бо чылын Тывада 13 школага үндезин септелгени чорудар. Ажылдарны апрельдиң 1-де эгелээш, күрүне керээзиниң сөөлгү хүнү – октябрьның 15-ке чедир доозар.
ТР-ниң Өөредилге яамызы тудуг организацияларының хөй кезии-биле күрүне керээлери чардынганын бадыткаан. Белен апаарга-ла, чаңгыс аай информация системазынче оларны киирер.
Ачы-дуза хандырыкчыларының аразында ажылынга ак-сеткилдиин көргүскен тудугжулар база бар. Он үш тудуг организациязының ындыг ажылдар кылырынга сези арга-дуржулгалыг. Эрткен чылын хары угда 27 школаны чаартып септээр ажылдарга олар эки киришкен.
Эрткен чылын Кара-Хаак суурнуң школазын септээн «Планета» КХН бо чылда Шагаан-Арыгның гимназиязын бүрүнү-биле хүлээнген. Чаа-Хөл суурнуң школазынга эки ажылдаан «Скат» КХН бо чылын О-Шынаа суурда ындыг объектиге ажылдаар. Сайгарлыкчы тудугжу Орлан Аракчаа Самагалтайның 2 дугаар школазы биле Тарлаг суурнуң школазынга капитал септелгелерни шынарлыг кылгаш, ТР-ниң Баштыңының Өөрүп четтириишкининге төлептиг болган. Бо тудуг сезонунда Тожу кожууннуң Тоора-Хем школазын бүрүнү-биле чаартыр.
Шагаан-Арыг хоорайның гимназиязын, Ак-Довурак биле Туран хоорайларда, Чал-Кежиг, О-Шынаа, Сесерлиг, Дөң-Терезин, Тоора-Хем, Сарыг-Сеп, Ак-Чыраа, Бүрен-Аксы, Булуң-Терек база Сосновка суурларда өөредилге объектилерин септээр тудуг организациялары тодараттынган.
