Тываның чеди муниципалдыг тургузуглардан 23 аныяк өг-бүле күрүнениң чуртталга сертификаттарын байырлыы-биле алган. Ол хемчег «Тыва Республиканың чурттакчыларын чедингир болгаш таарымчалыг чурттаар чер-биле хандырары» күрүне программазын боттандырып күүсеткенин, регионнуң Тудуг яамызы дыңнаткан.
Өг-бүлелер алган акша-хөреңгизин чуртталга айтырыын шиитпирлээринче: бирги рыноктан квартира азы бажың садып алырынче, боттуң бажыңын тударынче, ипотека чээлизиниң баштайгы төлевиринче азы бүрүнү-биле төлээринче ажыглап болур.
Үш азы оон хөй ажы-төлдүг аныяк өг-бүлелер ол социал төлевирни мурнады алыр. Ол ышкаш ашак-кадайның кайы бирээзи азы ийилдирзи тускай шериг операциязынга киржип турар, дайынчы хөделиишкиннер девискээринге чок болган киржикчиниң ажы-төлүн чааскаан азырап турар долу эвес өг-бүлелер ээлчег чокка сертификатты алыр.
Ажы-төл чок өг-бүлелерге деткимчениң хемчээли бажың өртээниң ортумак хемчээлинден эвээш дизе 30 хире хуу, а чаңгыс азы оон хөй ажы-төлдүг өг-бүлелерге, ол ышкаш долу эвес өг-бүлелерге – 35 хире хуу болур.
2026 чылда 83 аныяк өг-бүле чуртталга сертификадын алыр деп, Тываның тудуг яамызы дыңнаткан. Муниципалдыг тургузуглар удуртукчулары бо чоокку хүннерде арткан сертификаттарны аныяк чурттакчыларга чер-черлерге байырлыг байдалда тыпсыр.