Чөөн-Хемчик кожууннуң девискээринде Бора-Булак ховузунга чыл санында болуп эртер ээлчеглиг аът чарыжының XXIX сезонунуң ажыдыышкыны болган. Республиканың ырак-чоок кожууннарындан 350 аътты алды аңгы салыгга чарыштырган.
Чаңчыл болу берген чылдың эртер маргылдааның бо удаада кол деткикчи эрттирикчилери – Улуг-Хем биле Чаа-Хөл кожууннарның бот-тывынгыр уран чүүл коллективтери спортчу байырлалды каастаан.
Тываның Баштыңы Владислав Ховалыг республиканың аът чарыжының киржикчилеринге, эрттирикчилеринге, аарыкчыларынга, мөгейикчилеринге байырын чедирип, байза алган малдарның ээлеринге база аът мунукчуларынга шаңналдарны тывыскан.
– Өгбелерден дамчып келген адаан оюн чыл келген тудум сайзырап, киржикчилериниң көргүзүү экижип, чылгычыларның белеткели шыңгыырап, көрүкчүлерниң саны көвүдээни, маргылдааның деңнели бедип турарының бадыткалы-дыр. Сарыг шажында сагыш-сеткилдиң эң бедик шынары – хей-аъды болуп турары ханы уткалыг – деп, Владислав Ховалыг бодунуң чугаазында демдеглээн.
Чазак Даргазы көдээ ажыл-агый адырынга кирген үлүг-хуузу дээш шылгараан ишчилерге күрүне шаңналдарын тывыскан.
«Тыва Республиканың алдарлыг чылгычызы» атка Чаа-Хөлден хууда дузалал ажыл-агыйының баштыңы Валентин Дамдын-оол, Булуң-Теректен хууда дузалал ажыл-агыйының баштыңы Роман Чаш-оол, «Тыва Республиканың алдарлыг аът соодукчузу» атка Улуг-Хем кожууннуң Торгалыгдан Байыр Доржу олар төлептиг болган.
Тыва Республиканыӊ Аът спортунуӊ федерациязы алды салыглыг чидиг маргылдааның түңнелдерин дыңнаткан.
Чоруктуг чаваалар чарыжынга баштайгы үш байзаны Владислав Ховалыгның (Ак-Дуруг), Орлан Санчының (Торгалыг), Василий Лодай-оолдуң (Элегес) малдары тус-тузунда алган.
Аныяк чүгүрүк аъттар: Айдын Сат (Чөөн-Хемчик кожуун, Хайыракан), Айвар Күжүгет (Сүт-Хөл кожуун, Кызыл-Тайга), Арбак Дажы (Кара-Хөл).
Улуг чыраа малдар чарыжынга Айдыс Салчактың (Сукпак), Андрей Монгуштуң (Элегес), Ахмет Дарымажаптың (Кур-Чер) аъттары эрткен.
Улуг челер аъттар: Виталий Дондуп (Сесерлиг), Радомир Иргит (Кызыл кожуун), Алексей Бады-оол (Сукпак).
Улуг чүгүрүк аъттар чарыжынга баштайгы үш байзаны Викентий Күжүгеттиң (Аскы-Барлык), Серен-Доржу Балчыйның (Арыг-Үзүү), Байыр Доржунуң (Торгалыг) малдары тус-тузунда алган.
Маргылдааның кол салыы – тыва аъттарның чаражынга Барыын-Хемчиктен Эмес Кууларның малы чемпионнаан. Ийиги черге Байыр Доржунуң (Торгалыг), үшкү черге Владимир Санчының (Торгалыг) аъттары келген.
Тыва Республиканыӊ Аът спортунуӊ федерациязының даргазы Таймир Сарыглар шилчип чоруур Кубокту Чөөн-Хемчик кожууну хүлээп алганын дыңнаткан.
Адаан мөөрейге республиканың аңгы-аңгы кожууннарындан чүгүрүк малдарын чарыштырган аът ээлери, аарыкчылар, аът спортун сайзырадырынга үлүг-хуузун киирип чоруур кижилер, оюн-тоглаазы-биле чонунга бараан болган культура ажылдакчылары киришкен. Майгыннарда көдээ ажыл-агыйлары бүдүрген бараннарын садып-сайгарган.
Чуруктарны Буян Ооржак тырттырган
