Тывада бот-идепкейжи аныяктар төптерин тургузарынга муниципалдыг оран-саваны аңгылаан. Туран хоорайда болгаш Кызыл-Мажалык сумузунда төптерниң септелгези доостур чадазында.
Амгы үении-биле дериттинген аныяктар төптеринге кино залдары, хөгжүм болгаш дизайн студиялары, коворкинг, хостуг үе болгаш өөредилге эрттирер девискээрлер, тус черниң бот-идепкейжи аныяктарының штабтары турар.
Төптерни аныяктар политиказын комплекстиг хөгжүдер «Аныяктарга регион» программаның акшаландырыышкыны-биле чаартып турар.
Эрткен чылын Аныяктар херээниң талазы-биле федералдыг агентилелдиң «Аныяктарга регион» төлевилел мөөрейиниң тиилекчилер санынче ТР-ниң Аныяктар херээниң талазы-биле агентилели кирген. Ук программаны боттандырарынче республика 64 сая ажыг рубльди алган.
Бот-идепкейжи аныяктар төптериниң кол сорулгазы – муниципалдыг тургузугларда эки турачы, чогаадыкчы база сайгарлыкчы ажыл-чорудулгада хаара туттунган аныяктар санын көвүдедир дээш, өске-даа тодаргай болгаш чиге көргүзүглерни чедип алыры.
