Эрзин сумузунга тускай шериг операциязының маадыры, республиканың "Хендирбе сый шавар" оюннарының дөрт дакпыр тиилекчизи Айдыс Кыргыстың чырык адынга тураскааткан маргылдаа болуп эрткенин Тыва үндезин культура төвү дыңнаткан.
Маргылдааның кол аалчылары – Бурят Республиканың национал оюннар федерациязының даргазы Гомбо Зурбаков баштаан бөлүк. А.А. Кыргыс чаңгыс эвес удаа бурят чоннуң эрттирип турары "Алтан Мундарга" делегей чергелиг фестивальдың киржикчизи болуп чораан.
Автомашина шаңналдыг оюнга республикадан 63 хендирбечи киришкен. Изиг-изиг оюннуң түңнелинде шаңналдыг черлерни дараазында киржикчилер чаалап алган.
1-ги черде – Улуг-Хем кожууннуң төлээзи, 23 харлыг Булат Буддаев, 2-ги черде – Эрзин кожуундан 16 харлыг Дозураш Дирчинчап, 3-кү черде – Каа-Хем кожуундан 41 харлыг Омак Монгуш, 4-кү черде – Тес-Хем кожуундан 47 харлыг Алексей Дапый-оол.
Булат Буддаев шаңнал кылдыр алган автомашиназын маадырның оглунга белек кылдыр дамчыткан.
Чыылган чон Эрзин суурнуң Алдар Аллеязынга маадырның тураскаалының ажыдыышкынынга киржип, ооң чырык адын сактып, дириг чечектерни салган.
Оюнну А.А. Кыргыстың өг-бүлези, Эрзинниң спорт школазы база Тыва үндезин культура төвү демнежип эрттирген.