Булуң-Терек школазының өөреникчизи Байконурга Тываны төлээлээр

Чаа-Хөл кожуунда Булуң-Терек ортумак школазының өөреникчизи Айслана Монделе Байконурнуң космодромунче чорупканын ТР-ниң Өөредилге яамызы дыңнаткан. Ол «Баштайгыларның космиктиг экспедициязы» төлевилелге тиилээн болгаш, космиктиг корабльдың ужуп үнерин көөр аргалыг болган.

Россияның өске 88 регионундан идепкейжилер-биле кады Айслана Байконурга чедип, космонавтиканың чажыттарын сонуургаар. Тиилекчилерни солун программа манап турар: космодромга экскурсиялар, солун ужуражылгалар, ук адырда сөөлгү чылдарның чедиишкиннери болгаш космонавтиканың келир үеде хөгжүлдези дээш оон-даа өске.

«Баштайгыларның шимчээшкини» уруглар болгаш аныяктарның бүгү-российжи шимчээшкининиң Роскосмос-биле кады организастааны мөөрей апрель 12-де эгелээнин сагындыраал. Ооң бирги чадазында тестилерге харыылаан. Ийиги чадазы оон нарын. Киржикчилер космонавтика талазы-биле барык шинчилел ажылдарын кылган.

«Баштайгыларның» идепкейжизи Айслананың дыңнатканы-биле алырга, негелде школа деңнелинден оранчок бедик болган, ук адырга хамаарылгалыг бүрүн шинчилелди кылган. Ол салдынган сорулгазын чедип ап, Байконурга Тыва Республиканы төлээлээр.