«Деткимче» республика төвү ажыттынганындан бээр 20 чыл болганынга тураскааткан «Буянныг 20 ажыл-херек» акцияның чорудуу-биле Чөөн-Хемчик кожууннуң Өг-бүлеге болгаш уругларга социал дуза чедирер төвүнүң ажылдакчызынуң удуртулгазы-биле хүндүскү салбырның уруглары хоочун энеге ачы-дузазын көргүзүп, бажыңының серизинде харны дүжүр эжип, хериминиң иштин аштап арыглаан.
«Деткимче» республика төвү ажыттынганындан бээр 20 чыл болганынга ачы-буян концертин белеткеп турарын сагындыраал. Апрель 12-де Улусчу чогаадылга бажыңынга эртер болуушкун – коллективтиң 2023 чылда кол юбилейлиг хемчээниң бирээзи. Концерттен кирген акша-хөреңги-биле кадыкшылының байдалы-биле харык-шинээ кызыгаарлыг кижилерниң чогаадыкчы шөлүн ажыдарынче киириштирер.
Эрткен ийи он чылдар иштинде республика төвү профессионал ажылында чедиишикинниг арга-дуржулгаларны чыып алган. “Деткимчениң” коллективи бүзүрел телефону таварыштыр социал албан черлеринден тайылбыр алыр арга-дуржулганы 2006 чылда бир-ле дугаар ажыглап эгелээн.
Республикада улуг ужур-дузалыг төлевилелдерни боттандырган: чижээ, «Арголик» турисчи комплексти ажыдып, социал такси албанын база көжүп чоруур консультация пунктузун организастаан.
Берге байдалга таварышкан херээжен чонга салбыр, социал аалчылар бажыңы, тодаргай чурттаар чери база ажыл-агыйы чок кижилерге күш-ажылчы терапия салбыры, чонга херектиг болганын төп бадыткаан. 2012 чылда Тожу кожууннуң Чазылар суурда социал-күш-ажыл реабилитациязының тускай салбырын ажыткан.
Федералдыг база регион программаларынга төп киришкеш, хлеб быжырар черни, даараныр цехти, уругларга психологтуг оожургал өрээлин ажыдып, дерээн.
«Деткимче» республика төвү бөгүнде бажыңынга социал ачы-дузаларын, харык-шинээ кызыгаарлыг кижилерге социал реабилитацияны, тодаргай чурттаар чери чок кижилер-биле ажылдап турар республикада чаңгыс организация болур.
