Бөгүн «Делегейниң дириг эртинези» хүндүлүг аттың эдилекчизи, эртемден, шинчилекчи, этнограф, төөгү эртемнериниң доктору Моңгуш Борахович Кенин-Лопсан чораан болза, бо чылдың апрель 10-да 100 харлаар турган.
Чөөн-Хемчик кожууннуң төвү Чадаанада Монгуш Буян-Бадыргы аттыг Тываның национал музейиниң салбырынга "Буянныг өгбевиске мөгейиг" деп ужуражылга болуп эрткенин чагырга чери дыңнаткан.
Хемчегге Чадаана хоорайның болгаш кожууннуң сумуларындан хоочуннар болгаш Чадаананың бир дугаар ортумак школазының 10-гу классчылары киришкеннер.
Школа директор Доржу Монгуш сөс алгаш, Хөндергей чурттуг өгбевис, Тываның Улустуң чогаалчызы Тываның билдингир чогаалчызы, "Делегейниң дириг эртинези" аттың эдилекчизи, хөй номнарның автору Моңгуш Борахович Кенин-Лопсанның 100 харлаанынга тураскааткан делгелгениң ажыттынганын чыылганнарга таныштырган.
М.Б. Кенин-Лопсан Чадаанага Монгуш Буян-Бадыргы аттыг аттыг музейниң ажыттынарынга үлүүн киргенин демдеглээш, Тываның культуразының алдарлыг ажылдакчызы Зоя Балчыыракка сөстү дамчыткан.
Ол чылдарда культура эргелелиниң, килдизиниң удуртукчузу Зоя Балчыырак Кызылга Алдан-Маадыр аттыг музей чанында Монгуш Бораховичиниң ажылдап, шинчилел ажылдары кылбышаан, чон хүлээп ап турган казанаанга чедип, музей тургузар дээнин дыңнадып, ону кылып чорударының талазы-биле арга-сүме айтырган. Хүндүлүг чогаалчывыс эки эгелээшкинни деткээн.
Валерий Елизаров болгаш өске-даа музей ажылдакчылары Чадаанага келгеш ажылдап, музейниң ажыттынарынга чедир үлүг-хуузун кииргеннер. Баштайгы директору кылдыр Виктория Пюрюнааны томуйлаанын, кады ажылдап эгелээнин сактып чугаалап берген.
Ужуражылгага сактыышкыннарны хоочуннар чугаалап, чогааткан ырыларын, шүлүктерин номчаан. Делгелгеде өгбе чогаалчының бижик кагар машиназы, тоннары, бөрттери, номнары, хуваанактарын көргүскен.