Бөгүн, бүгү делегейниң Өг-бүле хүнүнде, Сергей Пюрбю аттыг улусчу чогаадылга бажыңынга «Быжыг өг-бүле – күштүг Россия» өг-бүлелер шуулганы болган.
Россияда чоннарның чаңгыс деминиң база Тывада чарлаттынган Тургузукчу күш-ажылдың болгаш өг-бүле ыдыктарының чылынга тураскааткан хемчегге интернационалчы болгаш ажыл-ишчи өг-бүлелер чыглып келген.
Чалаткан хүндүлүг аалчылар – чартык чүс чыл ажыг эгин кожа кады чурттап чоруур өг-бүлелер, Маадыр иелер.
Тываның Баштыңы Владислав Ховалыг шуулганның киржикчилеринге байыр чедирген.
– Бөгүн Россияның болгаш Тываның хөгжүлдезинге улуг үлүг-хуузу киирген өг-бүлелерни алдаржыдып тур бис. Бо чылын республикада тос өг-бүле «алдын», ийи өг-бүле «бриллиант» кудазын демдеглеп турар. Силер шуптувуска, ылаңгыя аныяк өг-бүлелерге мөзү-шынар айтыкчызы-дыр силер.
Маадыр иелер дугайында онзалап чугаалаксап тур мен. Ол ат – кызыгаар чок ынакшылдың, бердиниишкинниң болгаш сагыш-сеткил күжүнүң демдээ.
Өг-бүлениң езу-чаңчылдарының чугулазынга болгаш үш азы оон хөй ажы-төлдү кижизидер ада-иениң ролюнга тураскааткан байырлал – Хөй ажы-төлдүг өг-бүлелер хүнүн тургусканывысты билир силер. Ону бир дугаар сентябрьның үшкү субботазында – сентябрь 19-та демдеглээр бис.
Тускай шериг операциязының киржикчилериниң өг-бүлелериниң төрел аймааның эр кижилери кырган-ачаларының болгаш адаларының езу-чаңчылдарының төлептиг салгакчылары. Силерниң өг-бүлелериңер – быжыг туруштуң болгаш чаңгыс демниң чижээ.
Тывада ажы-төлдүг өг-бүлелерни деткиир хемчеглер ажылдап турар. Уруглар садтарын болгаш школаларны тудуп, чаа спортчу болгаш культура төптерин ажыдып турар бис – деп, ол чугаалааш, Тыва Республиканың “Өг-бүлениң үнелиг чүүлдерин кадагааны дээш” медалын чартык чүс чыл ажыг эгин кожа кады чурттап чоруур өг-бүлелерге тывыскан.
Кызылдан Тавалай Чилбакаевич биле Зоя Тюлюшевна Салчактар 60 ажыг чыл, Бии-Хемден Өпей-оол Сюр-оолович биле Елизавета Кырынчыковна Кара-Салдар, Улуг-Хемден Маадыр-оол Дожуевич биле Мария Монгушевна Сурун-оолдар база Сергей Туматович биле Раиса Сымчан-ооловна Санчылар, Барыын-Хемчиктен Владимир Дагааевич биле Хүрең Орус-ооловна Донгактар 50 ажыг чыл эгин кожа кады чурттап чоруур өг-бүлелер.
Тывада салгал дамчаан башкы, эмчи, малчын… өг-бүлелер хөй. Республиканың, кожууннуң социал-экономиктиг хөгжүлдезинге улуг үлүг-хүүзүн кииреринден аңгыда, салгал дамчаан ажыл-ижин чедиишкинниг уламчылап чоруур болгаш ажы-төлүн төлептиг кижилер кылдыр өстүрүп, кижизидип турар өг-бүлелерни кожуун бүрүзүнден илереткен.
Байырлыг хуралга шуулганның түңнелдерин үндүрген. ТР-ниң Дээди Хуралының Даргазы Каң-оол Даваа тиилекчи өг-бүлелерге шаңналдарны тывыскан.
ТР-ниң Дээди Хуралы республиканың хөй-ниити организациялары-биле бо улуг төлевилелди боттандырып, шуулганны чеди дугаар чыл эрттирип турар.
Чингис Сааяның тырттырган чуруктары
