Cалгалдар аразында харылзааны быжыглаар оюн-тоглаа

Чеди-Хөл кожууннуң төп үлегер-майыктың ном саңының библиотекарьлары 14 хардан 30 харга чедир аныяктарны «Алдын кажык» деп тыва оюннар (даалы, шыдыраа, хорул, кажык, тевек…) клувунче чалап турарын дыңнаткан.

– Шаандан тура бистиң өгбелеривис кышкы узун кежээлерде, дең чырыынга ойнап-хөглээри, боттарын чалгааратпас оюн-тоглаалары хөй турган. Аңаа аалдың улуг-бичии улустары шупту киржир турган. Ындыг болгаш салгалдар аразында харылзаа дыка быжыг турган. Улуг улус уругларынга боттарының билири оюннарын болгаш аас-чогаалдың аңгы-аңгы хевирлерин шуут дорт дамчыдып бээр чаагай чаңчылдыг турганы ол.

Амгы үеде салгалдар аразында харылзаа ырап, улуг улус-биле ажы-төлүнүң аразында харылзаазының чидип бар чыдар барымдаазы бары чажыт эвес. Ажы-төл-биле кады бир-ле чүүдү кылып, сеткилинден чугаалажып, оюн-тоглаа-даа кады ойнаарга, өг-бүлеге онза байдал тургустунар болгай – деп, ном саңының чурт шинчилел килдизиниң эргелекчизи Айлана Соян демдеглээн.

Чаартынган ном саңының библиотекарьлары уругларны болгаш ада-иелерни школадан дашкаар дыштаныр хүннерни ажыглап, "Алдын кажыкче" ойнап кээринче чалап турар.