Чөөн-Хемчик кожуунга Даа хожууннуң тургустунганындан бээр 260 чылын август 29-30 хүннеринде байырлап демдеглээр. Ол улуг болуушкунга тураскааткан хемчеглерни белеткеп база эрттирер оргкомитеттиң ээлчеглиг хуралын ТР-ниң Чазак Даргазының оралакчызының хүлээлгезин күүседип турар Уран-оол Ондар удуртуп эрттирген.
Тываның эң улуг Чөөн-Хемчик кожуунунуң үндезилеттинип тургустунганындан бээр 260 чылын төлептиг демдеглеп эрттирери-биле “орук картазын” тургускан, кожууннуң девискээринде дыка хөй төлевилелдерни боттандырып турар. Кожуун президентиниң национал төлевилелдер мөөрейлеринге киржип, шилилдени эрткеш, чаа объектилерни тутканын, байырлал хүннеринде оларның байырлыг ажыдыышкыннары болурун кожуун чагырыкчызы Айдыс Куулар илеткээн.
Кожууннуң 260 чылын демдеглээн хүннерде кожууннуң Малчыннар наадымын база чергелештир эрттирери планнаттынган. Ийи дакпыр байырлалга тураскааткан улуг хуралда кожууннуң хөгжүлдезинге улуг үлүг-хуузун киирип, ажыл-агыйынга шылгараан көдээ ишчилерни, адырларның мурнакчыларын демдеглеп, шаңнал-макталдарны тыпсыр.
Кожууннуң юбилейин демдеглээр байырлал планында регионнар аразының, республика, кожуун чергелиг хөй санныг хемчеглер кирген. Бо чылдың январьда Тываның гуманитарлыг болгаш тускай социал-экономиктиг шинчилелдер институду “Хемчик кожуун төөгүнүң чылдарын өттүр” деп “төгерик столду” эрттирип, кожууннуң төөгүзүнче чаа көрүштү ажыткан. Оон аңгыда кожууннуң өөредилге черлери темалыг класс шактарын, ажык кичээлдерни, делгелгелерни, чуруктар делгелгелерин, экскурсияларны организастаан.
Кожууннуң төпчүткен ном системазы суурларда салбырлары-биле кады кожууннуң алдар-аттыг, ажыл-ишчи кижилериниң дугайында төөгүлүг материалдарны үндүрүп турар. Кожуун чагыргазы кожууннуң юбилейинге тураскаадып номну парлап үндүрерин белеткэн. Оон аңгыда Тываның Камбы-Лама эргелелиниң чалааны Индияның Гоман хүрээзинден ламаларның “Үстүү-Хүрээ” хүрээзинде кылганы Комбу сагыызын мандалазын бузар шажынчы езулал база болуп эртер.
“Кадыкшыл”, “Өөредилге”, “Көдээ суурларның комплекстиг хөгжүлдези” национал төлевилелдер боттандырылгазы-биле кожууннуң чурттакчы чонунуң амыдырал байдалын экижидеринче угланган чугула төлевилелдер – Чадаана хоорайда 616 олуттуг чаа школа, Бажың-Алаак суурда фельдшер-акушер пунктузу, кожууннар аразының эмнелге төвүнде эде чаартынган кезиишкин салбыры, Чадаана – Бажың-Алаак аразының автомобиль оруу дээн ышкаш, чаа объектилерни байырлалдың кол хүннеринде байырлыы-биле ажыдары көрдүнген.
Ол ышкаш республика чергелиг культура-спортчу хемчеглер кожууннуң чурттакчыларындан аңгыда, ырак-чооктан келген аалчыларның сонуургалын хаара тудар. Август 8-9-та тыва оюннарга база сыгыт-хөөмейге “Алдын кажык” регионнар аразының фестивалы болур.
Август 29-30 хүннеринде республиканың аът чарыжы, баг адары, эң шыырак мөгелерниң тыва хүреш, шыдыраа, хол бөмбүүнүң маргылдаалары, “Таңды-тыва тажызы” деп эр тура-соруктуң мөөрейи, “Сүт байырлалы” байырлал, “Эң узун быштак” аъш-чем мөөрей-фестивалы, Өглер хоорайжыгажы дээш, дыка хөй хемчеглер планда кирген.
Кожууннуң чогаадыкчы коллективтериниң, алдар аттыг артистериниң байырлал концерттери сеткил-хөөннү улам көдүрер.
Чөөн-Хемчик кожуун чагыргазы байырлалынче алдар-аттыг чаңгыс чер чурттуу С.К. Шойгуну болгаш өске-даа ады-сураа алгаан алдарлыг кижилерни, Моолдуң Цэнгэл сумузундан аалчыларны хүндүлүг аалчылар кылдыр чалаанын дыңнаткан.
У.А. Ондар чалаттырган аалчыларга аңгы турисчи маршруттарны тургузуп, моон-даа соңгаар кады ажылдажылганың арга-хевирлерин ажылдап кылыр даалганы оргкомитет кежигүннеринге дааскан.
