Бии-Хем кожууннуң Аржаан сумузундан «Чаа сорук» төлевилелиниң 2021 чылдың киржикчизи Орлан биле Сюзана Доржукайлар ийи чыл улаштыр чээрби баш инээнге онааштыр ол-ла хире бызааны онча-менди камгалап алганнар.
Өг-бүле Чанзаш деп черде малчын турлаан тудуп алган. Өгнүң эр ээзи эрткен күзүн долу эвес мөөңнээшкин езугаар шериг албан-хүлээлгезин күүседири-биле кыйгырткан. Ол амгы үеде шөлээлеп келген.
Төлевилелдиң киржикчилери ийи ажы-төлдүг. Дыштанылга үезинде олар ада-иезиниң солуттунмас дузалакчылары апаар. Уруглары бо чылын хаваанда чүрек демдектиг төрүттүнген бызаазын «Чүрекпен» деп шолалай адап алганнар.
Доржукайлар мал чемин четчир кылдыр белеткеп алган болгаш кыштаглаашкын чүгээр байдалга эрткен. Сюзана Доржукай сумунуң фельдшер-акушер пунктузунда ажылдап турар.
Өг-бүле саан үезинде сүдүн «Аржаан» көдээ ажыл-агый хереглел кооперативиниң сүт болбаазырадыр цегинче артыкшылдыг сүдүн дужаап, акша-төгерикти ажылдап алыр аргалыг.
Малчын өг-бүлени Орлан Доржукайның кады төрээн акызы, төрел аймаа, Аржаан суму чагырга чериниң удуртулгазы, сумунуң чурттакчылары дайынчы хөделиишкиннер девискээринде шериг албан-хүлээлгезин күүседип турар маадыр чаңгыс чер-чурттуун деткип, ачы-дузазын доктаамал көргүзүп турар.
