Чүс дөрт сумунуң үндезин аттарын эгиткен

ТР-ниң Дээди Хуралдың Тывада сумуларның үндезин аттарын эгидери, федералдыг болгаш республиканың документилеринде карышкактарны узуткаары-биле кылдынган ажылының дугайында демдеглелден.

Күрүнениң географтыг аттар каталогунда сумулар тыва топонимиканың дүрүмнеринге дүүшпес аттар-биле киирдинген турган. Чижелээрге, Бижиктиг-Хая сумузунуң орнунда Бижик-Хайский деп бижиттинген, Арыскан сумузунуң орнунда Арысканский, Хову-Аксы орнунда Хову-Аксынский дээш оон-даа өске.

Дээди Хуралдың эрге-чагырганыӊ федералдыг болгаш тус чер бот-башкарылга органнары, хамааты ниитилелдиӊ институттары-биле кады ажыл чорудар болгаш информация политиказының талазы-биле комитеди Артур Монгалдың удуртулгазы-биле шүүттүг болгаш узун хуусаалыг ажылды архив документилери-биле чоргускан.
Сумуларның үндезилеп тургустунган, оларның аттарын шын бижиирин бадыткап турар нормативтиг эрге-хоойлу актыларны архивтерден дилээринче чүс-чүс шактарны чарыгдаан.

Ук документилерге даянып алгаш, Дээди Хурал Тываның Административтиг-девискээрлерниң эге хемчээлдер даңзызынче өскертилгелерни киирген. Оон ыңай чогуур ужурлуг федералдыг албан черинче дилегни кииргеш, деткимчени алган. Тываның 104 сумулары «-ский» деп кожумак чок үндезин аттарын эгиткен.