Социал керээге үндезилээн күрүне деткимчезиниң ачызында Барыын-Хемчик кожууннуң Эрги-Барлык суурдан беш өг-бүле хууда дузалал ажыл-агыйын ажыткан. Оларның үжү бызаалыг ийи инекти, бир өг-бүле герефорд уксаалыг үш молдурганы садып алган.
Эрги-Барлыктың чонун дагаа чуургалары-биле хандырар дээш, Артыш биле Чойган Донгактарның өг-бүлези бо чылын 40 дагааны садып алганнар. Өгнүң кыс ээзи садыгжы. Ооң ада-иези дагаалар тудуп турган болгаш ол кушту канчаар азыраарын дыка эки билир. Донгактар үш ажы-төлдүг.
Барыын-Хемчик кожууннуң чагырга даргазы Алексей Маркс-оолдуң дыңнадып турары-биле алырга, ажылгыр, кежээ социал деткимче алыкчылары дагааларын чидириг чок өстүрүп, чуургаларын чонга садып-сайгарып, өг-бүлезиниң орулгазын көвүдедип ап турарлар.
Кызымаккай кижилерге амыдырал-чуртталгазын экижидип ап болурунга күрүнеден дээштиг дуза – социал керээ дээрзин арга-дуржулга көргүскен.
