Чаа чылдың тоолчургу илби-шидизи:Владислав Ховалыг уругларның күзелдерин боттандырган

Декабрьның 24-те Тываның Баштыңы Владислав Ховалыг Кызыл хоорайдан 5 харлыг Данил Кочневтиң күзелин “Күзелдер шивизи” акция чорудуу-биле боттандырган.

Данил авазы Галина Анатольевна база ийи харлыг дуңмазы Дима-биле чурттап турарлар. Ачазы Руслан Наркисович тускай шериг операциязының үезинде Ада-чуртунуң сонуургалын камгалап тургаш, маадырлыы-биле чок болган. Данил манавааны белекти алырын күзээн.

Владислав Ховалыг бичии оол стол оюннарынга ынак деп билип алгаш, чыыр конструкторларны, кандыг-бир чүүл чогаадыр база стол оюнун белеке берген.

Кызылдан беш харлыг Даваа Тываның Баштыңындан кайгамчык белээн алган. Аңаа стол оюннары, тыва тоолдарны база чуруттунар комплектини Баштыңның дузалакчызы тывыскан.

Ол-ла кежээ Шагаан-Арыгдан Тензинниң күзели база бүткен. Оол Кызылдан “ДримТим” деп бут бөмбүүнүң клуву-биле ужуражырын күзээн. Кежээки үеде 17 дугаар школага ынак командазы-биле кады белеткенир аргалыг болган. Тываның Баштыңы бичии оолга бут бөмбүүн база ооң ынак бут бөмбүкчүзү Криштиану Роналду дугайында номну белекке берген.

Ооң мурнунда Владислав Ховалыгның даалгазы-биле, тускай шериг операциязының талазы-биле ооң тускай төлээзи Тимур Куулар Луганск Улусчу Республиканың Червонопартизансктан 15 харлыг Илона Гурованың кайгамчык белек манаан күзелин күүсеткенин сагындыраал.

Россияда «Күзелдер шивизи» деп акция каш чылдар дургузунда эртип келген болгаш, Владимир Путинниң, федералдыг сайыттарның болгаш регионнарның удуртукчуларының хууда киржилгезиниң ачызында нептереңгей апарган.

Акцияның сорулгазы – амыдыралдың берге байдалдарынга таварышкан кижилерге өөрүшкүнү болгаш Чаа чылдың илби-шидизиниң сеткил-сагыжын сөңнээр. Акция бүгү Россия Федерациязында 2018 чылдан эгелеп боттанып, буянныг үүле кылырынга белен муң-муң сагыш човаачал хамаатыларны каттыштырып турар. Россияның кандыг-даа чурттакчызы уругнуң күзелин боттандырып болур.