Чаа эмнелге объектилери немежир

Бо чылын «Кадык камгалалы» национал төлевилелдиң чорудуу-биле медицина албан черлериниң алды чаа объектизин тудар.

Амгы үениң фельдшер-акушер пунктуларын Өвүр кожууннуң Чаа-Суур, Бий-Хем кожууннуң Шивилиг, Тес-Хем кожууннуң Белдир-Арыг, Тожу кожууннуң Сыстыг-Хем, Таңды кожууннуң Успенка сумуларынга тудар. Эрзин кожууннуң Мөрен сумузунга эмчи амбулаториязы туттунар.

Ол ышкаш Барыын-Хемчиктиң кожууннар аразының медицина төвүнүң уруглар поликлиниказының үндезин септелгезин бо чылын доозар. Оран-саваның септелгезин 2022-2023 чылдарда ийи чадага чорудары планнатынган. Бо хүнде тудуг объектизиниң белени 71 хуу.

Чыл дургузунда республиканың медицина албан черлери 86 кезек дериг-херекселди алырын ТР-ниң Кадык камгалал яамызы дыңнаткан.