Тываның Чазааның чанында назы четпээннер херектери болгаш оларның эргелерин камгалаар талазы-биле албан черлер аразының комиссиязының чарлааны Адалар хүнүнге тураскааткан видео байыр чедириишкин мөөрейиниң тиилекчизин болгаш шаңналдыг черлер ээлээн улусту шаңнаан.
ТР-ниң Чазак Даргазының оралакчызының хүлээлгезин күүседип турар Алексей Сазан-оол тиилекчилерге байыр чедирген.
Чаа-Хөл кожуундан Кууларларның өг-бүлези – адазы Сыдым-оол Мактал оглу биле оглу Сүлде бирги черни ээлээш, хүндүлел бижикти, 5000 рубль акша шаңналын база Тываның В. Көк-оол аттыг Национал хөгжүм-шии театрынче алды билетти алганнар.
Ийиги черни Бии-Хем кожуундан тускай шериг операциязының киржикчизи, бот-ада Сылдыс Ховалыгның чеди ажы-төлдүг өг-бүлези ээлээн. Оларга хүндүлел бижикти, 3000 рубль акша шаңналын, Тываның күрүнениң ойнаар-кыстар театрынче он билетти тывыскан. Барыын-Хемчик кожуундан школаның «Алаш» спорт клуву үшкү черни ээлээш, хүндүлел бижикке, бир муң рубль акша шаңналынга база «Сүбедей» спорт комплекизиниң дош залынга дыштаныр он билетке төлептиг болган.