Дүүн Чаа-Хөл суурнуң девискээринде хову өрттү илереттингенин чагырга чери дыңнаткан. Ооң шөлү дөрт гектар.
Өрттү өжүрери-биле Чаа-Хөл кожуун чагыргазының, өөредилге килдизиниң, өрт кезээниң эр ажылдакчылары дөрт машиналыг үнген.
Апрель 15-тен эгелеп Тывада өртке удур айыыл чок чоруктуң онза чурумун чарлаанын сагындыраал. Республикада хенертен изип эгелээнинден, кургаг агаардан болгаш бичии-ле салгын-сырындан өрт айыылының 4-кү клазы тургустунган.
Айыыл чок чорук дүрүмнерин хажытканындан арга-арыг өрттери үнген таварылгада, ол чурум езугаар 15000-дан 60000 рубль чедир административтиг торгаалга онаажыр.
Ол ышкаш кеземче харыысалгазын онаары база көрдүнген: бир сая рубль чедир торгаалдарга онаажып, 10 чылга чедир хосталгазын казыдып болур.