Чаа коронавирус хамчыындан 13 таварылга бүрүткеттинген

Чаа чылдың бирги неделязында Тывада чидиг респираторлуг вирустуг халдавырдан аараан 608, а грипптиң А хевиринден – 5, Covid-19-тан 9 кижи аараан деп, Росхереглелхайгааралдың Тыва Республика талазы-биле эргелели эпидемиологтуг байдалга неделяның мониторинг түңнелин Тываның Баштыңы Владислав Ховалыгга таныштырган.

Тываның кол санитар эмчизи Людмила Салчактың дыңнатканы болза, эрткен неделяга деңнээрге чидиг респираторлуг вирустуг халдавырдан база грипптен аарыыры 10 муң чурттакчыга онааштыр 14,3 турганындан, 18 чедир өскен. Өзүлде 26,1 хуу. Ындыг болзажок эпидемиологтуг деңнелден 21,9 хуу куду.

Назы-хар аайы-биле чамдык бөлүктерде чидиг респираторлуг вирустуг халдавырдан база грипптен аарыыр чорук эвээш. Ийи харга чедир чаштарның аарыыры эпидемиологтуг деңнелден 40,3 хуу, 3-6 харлыг чаштарның 26,7 хуу, 7-14 харлыг элээдилерниң 43,3 хуу, 15 хардан өрү назылыг кижилерниң 44,9 хуу эвээш.

Бичии өпеялар болгаш улуг улус аразында халдавырлыг аарыгларындан аарыыры неделяда 1,5 катап өскен.

Covid-19 талазы-биле эпидемиологтуг байдал ажырбас. Чаа чылдың бирги неделязында республикада чаа коронавирус хамчыындан 13 таварылга бүрүткеттинген – дөрт улуг кижиде база 17 хар чедир тос уругда. Ооң мурнунда неделяга деңнээрге, аарыыр чорук 71,1 хуу кызырылган.

Чидиг респираторлуг вирустуг халдавырдан база грипптен аараан 138 кижи байырлал хүннеринде эмнелгелерге чыдып эмнеткен. Эмнелгелерге чыттырган кижилерниң хөй кезии, азы 114 кижи – 14 харга чедир бичии уруглар. Covid-19 деп диагнозтуг 12 кижи эмнелгелерде, 29 кижи амбулаторияларда эмнедип турар.