Бии-Хем кожууннуң Сесерлиг сумузунда «Сорунза» төлевилел-биле көдээ культура бажыңы туттунуп турар. ТР-ниң Дээди Хуралының депутады Аяна Монгуш тудугжулар-биле ужуражып, тудуг ажылдары график езугаар чоруп турарын демдеглээн.
Сумуда 216 өреге бар. Сесерлигжилер чоннуң тудуунда шуптузу идепкейлиг киржип, чаа культура одаан өй-шаанда ажыглалче киирер дээш, демин көргүзүп, үлүг-хуузун киирип турарлар. План езугаар 243 дөрбелчин метр ниити шөлдүг, 120 олуттуг көдээ культура бажыңы эжиктерин октябрь айда ажыдарын сумунуң удуртулгазы дыңнаткан.
Тудуг бригадаларынче кожууннуң культура ажылдакчылары болгаш сумунуң чурттакчылары кирген.
