Чаа Культура сайзыралының төвүнде Шагааның оюн-тоглаалыг хемчеглери

Чурттуң Президентизи Владимир Путинниң эгелээни «Культура» национал төлевилелдиң күүселдези-биле ажыттынган «Спутник» микрорайонунда амгы үениң Культура сайзыралының төвүнде Шагааның оюн-тоглаалыг хемчеглери уламчылап турар.

Тываның национал оркестриниң артистери уругларны культура одаанче чалап, «Шагаалаалы» деп оюн-тоглаалыг хемчеглерни эрттиргенин оркестр дыңнаткан.

«Найысылалдың чамдык микрорайоннары дыка дүрген өзүп турар болгаш, чүгле школалар болгаш уруглар садтарын эвес, а культура объектилерин тударын база боданыр апаар. Чурттуң Президентизиниң эгелээшкиннерин амыдыралга боттандырар дээш комплекстиг арганы ажыглаары чөптүг. «Культура» национал төлевилел күүселдези-биле «Спутник» микрорайоннуң чурттакчыларынга Культура сайзыралының төвүн туткан. Чоокта чаа-ла чүү-даа чок турган девискээр, ам таныттынмас болу берген» деп, Тываның Баштыңы Владислав Ховалыг төптүң байырлыг ажыдыышкынының үезинде чугаалаан.

«Сельстрой» тудуг компаниязы «Спутник» микрорайоннуң чурттакчыларынга амгы үениң культура албан черин ийи чыл иштинде туткан. Ынаар федералдыг болгаш республика бюджеттеринден шупту 165 ажыг сая рубльди киирген.