Публицист, шылгараңгай күрүне болгаш эрге-хоойлу ажылдакчызы Борис Балчий-оолдуң номчукчуларга бараалгаткан «Маадырларга мѳгейиг» деп бирги номунда тускай шериг чорудулгазының киржикчилери ‒ дайынчыларныӊ дугайында барымдаалыг сактыышкыннар киргенин Тываның Чогаалчылар эвилели дыңнаткан.
Автор тѳѳгүге даянган чыындызында 25 маадырның автопортреттиг очерктерин тургузуп, оларның бот-намдарларын, ѳѳрүшкү-муңгаралын, чедиишкиннерин, чидириглерин сѳстүң күжү-биле кыска чогаалдар кылдыр киирген.
«Бодум хуумда хөй ада-иелерни, оларныӊ оолдарын билир, чаӊгыс эвес удаа ужуражып турган болгаш, эки сагындым. Балыгланган дайынчыларга госпитальга барып ужуражып, оларныӊ сактыышкыннарын бижип алганым, ажыктыын ам билдим. Маадырлыы-биле амы-тынындан чарылган оолдарныӊ иелери, чоок улузунуң сүмелерин дыӊнап, кыска чогаалды бижип, оолдарывыстыӊ чырык адын мөӊгежидерин кызыттым» ‒ деп, автор эге сѳзүнде бижээн.
Кыска чечен чугааларын болгаш шүлүктерин Россияның төп солуннарынга, сеткүүлдеринге парлаан. Авторнуң маадырларга тураскааткан чогаалдары бедик үнелелди ап, Москвага чарлаан «Маадырлар бооп төрүттүнмес. Ада-чурт дээш» деп мөөрейниң шилилгеге үш дакпыр тиилекчи болган. Чогаалдары фронтуда дайынчыларже тараан.