Тывада өөредилге инфратургузуунуң комплекстиг чаартылгалары уламчылап турар.
Тываның Баштыңы Владислав Ховалыгның даалгазы езугаар чаа школалар тудуглары база өөредилге албан черлериниң үндезин септелгелери-биле чергелештир, амгы үениң дериг-херекселдери-биле дериир ажылдар база чоруп турар.
Чаа өөредилге чылында республиканың 97 өөредилге албан черин дериг-херекселдер-биле четчелээр. Ол ажылды амгы үениң негелделеринге дүүштүр өөредилге хүрээлеңин тургузарынче угланган «Аныяктар болгаш уруглар» национал төлевилелдиң «Шупту эки чүүлдү – уругларга» федералдыг төлевилел-биле чорудуп турар.
Амгы үениң дериг-херекселин физика болгаш технология, чурумалдыг уран чүүл болгаш хөгжүм кабинеттери алыр. Ол чүүл өөредилге чорудуун практика кырынга ажыглаарынга, школачыларның шинчилел ажылдарын чорударынга, төлевилел болгаш чогаадыкчы ажылдарны делгемчидеринге, ол ышкаш өөредилгениң шынарын бедидер арганы бээр.
Школаларның материал-техниктиг баазаларын чаартыры республиканың өөредилге адырының хөгжүлдезиниң талазы-биле системалыг ажылының кезээ болуп турар. Амгы үениң кабинеттери база дериг-херекселдер уругларга шынарлыг билигни алырынга, оларның салым-чаяанын илередиринге база хереглелдиг арга-мергежилдерни шиңгээдип алырынга таарымчалыг байдалды тургузар.
Ол ышкаш чоорту школа инфратургузуун чаартыр ажылдар уламчылап турар – уруг бүрүзү чурттап турар чери хамаанчокка амгы үениң таарымчалыг байдалынга өөренир аргалыг болур.
Бо чылын «Аныяктар болгаш уруглар» нацтөлевилелдиң ачызында Туран хоорайда чаа школа туттунуп турар, ол ышкаш өөредилге албан черлеринде чаартылгалар болгаш үндезин септелгелер чоруп турар.
ТР-ниң Чазааның парлалга албанының медээзи болгаш чуруу
