Тываның Өөредилге яамызы «Көдээ черниң башкызы» федералдыг программа-биле республиканың кожууннарында көдээ школаларга ажылдаар дээш көжүп турар башкыларга чаңгыс катап бээр компенсация төлевирин алыр эрге дээш мөөрей шилилгезин эрткен сес кордакчы-биле үш талалыг керээни чарган. Шупту кордакчыларның аразындан беш чыл дургузунда ол угланыышкын-биле школага ажылдаар дээш 1 сая рубль түңнүг компенсацияны алыр сес кижи шилип алдынган.
Бежен муң чедир чурттакчылыг хоорайлар база «Көдээ черниң башкызы» федералдыг программа-биле чедишпес кадрларын долдуруп болурун сагындыраалыңар, ынчалза-даа олардан бо чылын чаңгыс-даа чагыг кирбээн. Бай-Тайга кожууннуң Хемчикке эге класс башкызы, Барыын-Хемчик кожууннуң Барлык суурнуң школазынга математика, Чөөн-Хемчик кожууннуң Чыргакы школазынга орус дыл болгаш чогаал, Мөңгүн-Тайга кожууннуң Мугур-Аксының 1 дугаар школазынга төөгү болгаш ниитилел билиглериниң башкызы хостуг олуттарже мөөрейни чарлаан. Тандының Успенка биле Улуг-Хемниң Хайыракан школалары математика болгаш физика, Сүт-Хөл кожууннуң Ак-Даш школазынга биология болгаш химия, Эрзин кожууннуң Бай-Даг школазынга англи дыл башкылары ажылдап эгелээр.
Ыраккы кожууннарже кордакчылардан эң хөй: Бай-Тайга кожууннуң Хемчик школазының эге класс башкызынче сес, Эрзин кожууннуң Бай-Даг школазынга англи дыл башкызынче чеди билдириишкин кирген. Улуг-Хемниң Хайыракан школазының математика болгаш физика, Барыын-Хемчик кожууннуң Барлык школазының математика башкызынга ажылдаар күзелдиг чүгле ийи кижи бар болган. Шилилдени эрткен кордакчылар 2025 чылдың сентябрь 1-де ажылынче кирген.
2020 чылдан бээр Тывада эки ажылдыг «Көдээ черниң башкызы» федералдыг программаның күүселдези – кадрлар чедишпес көдээ школаларже башкыларны хаара тудар сорулгалыг. Башкылар тывылбас суурларже башкы кадрларны бо программа-биле чорудуп турар. Көдээ суурларда эвээш комплектилиг школаларны бирги ээлчегде кадрлар-биле четчелээр ужурлуг.
Программа күүселдези-биле сөөлгү чылдарда 70 киржикчиниң 30-и республиканың эвээш комплектилиг школаларынче ажылдап чоруткан.