Чаа школага өөреникчилер үе-шаанда парта артынга олуруптар

Тывада өөредилге системазының инфраструктуразы шалыпкын сайзырап турар. Амгы үеде Чадаанада, ыраккы Каа-Хемде, Кызыл-Хая, Бай-Хаак, Балгазын суурларда чаа школаларда тудуг ажылдары чоруттунуп турарын ТР-ниң Өөредилге яамызы дыңнаткан. Чааты суурда «Көдээ черлерниң комплекстиг хөгжүлдези» күрүне программазы езугаар 176 олуттуг школа тудуу эгелээн.

– ТР-ниң Чазак Даргазының оралакчылары Орлан Сарыглар болгаш Олег Лукин -биле Таңды кожууннуң тудуг объектилеринге четкеш, оран-саваны хүлээп алырынга хамаарышкан айтырыгларны болгаш чогуур документилер-биле ажылды сайгарып чугаалаштывыс.

Балгазында школа тудуун хулээдиринге белени бедик деңнелде. Оюъектиниң девискээрин чаагайжыткан, оран-саваның иштинде дериг-херекселдерни эптеп салып эгелээн. Башкылар школаның ажыдыышкынын четтикпейн манап турарлар. Бо чоокку үеде школага бирги коңганың үнү чаңгыланып, чаа школага өөреникчилер үе-шаанда парта артынга олуруптарынга чедир хөй эвес үе арткан, ону ажыглалче киирериниң документ-саавырынга хамаарышкан айтырыгларны хууда хыналдага алдым. Дөзевилел-төлевилел езугаар школа 616 олуттуг дээрзин демдеглекседим.

Таңды кожууннуң төвүнде школа 825 олуттуг. Чаңгыс аай хевирниң төлевилели, аңаа кадыкшылының аайы-биле харык-шинээ кызыгаарлыг уругларга таарымчалыг байдалдарны тургузары көрдүнген. Чаа стандарттар езугаар амгы үениң эт-севи-биле дериттинер. Бо чылдың төнчүзүнге чедир школаны ажыглалче киирер болгаш, үшкү улдуңда аңаа өөредилге ажыл-чорудулгазы эгелээр – деп, өөредилге сайыдының албан-хүлээлгезин күүседип турар Елена Самбала дыңнаткан.